LIGJET E BIZNESIT
Projektligji për ndryshimet në taksat kombëtare parashikon rishikimin e mënyrës së llogaritjes së taksës vjetore për automjetet e përdorura, si dhe ndryshime në tarifat që paguajnë kategori të caktuara mjetesh. Ndryshimet janë pjesë e propozimeve fiskale për vitin 2027 dhe pritet të hyjnë në fuqi më 1 janar 2027, nëse miratohen. Sipas projektligjit, formula aktuale e taksës vjetore për automjetet e përdorura parashikon një tarifë fikse prej 12.5 lekësh për naftën dhe 10 lekësh për benzinën. Me skemën e propozuar, llogaritja do të ndryshojë në varësi të cilindratës, llojit të karburantit dhe karakteristikave të tjera të automjetit. Në këtë formulë do të përfshihen edhe automjetet e moshës 0–3 vjeç, të cilat aktualisht nuk i nënshtrohen kësaj takse sipas skemës përkatëse. Përmes këtyre ndryshimeve, të ardhurat vjetore nga taksa e automjeteve të përdorura parashikohen në rreth 32.3 miliardë lekë.
Projektligji parashikon gjithashtu rritjen e taksës vjetore për automjetet luksoze nga 21 mijë në 40 mijë lekë. Ndërkohë, për rimorkiot dhe gjysmërimorkiot propozohet një taksë prej 1 lek për kilogram për mjetet me peshë deri në 50 mijë kilogramë, ndërsa për ato që e tejkalojnë këtë peshë parashikohet një tarifë fikse prej 60 mijë lekësh në vit. Një tjetër ndryshim lidhet me shpërndarjen e të ardhurave nga taksat e automjeteve. Pjesa që përfitojnë njësitë e qeverisjes vendore propozohet të ulet nga 25% në 5%, ndërsa komisioni i agjentit të mbledhjes së taksës për kategoritë përkatëse parashikohet të reduktohet nga 5% në 1.8%.
Sipas parashikimeve të projektligjit, të ardhurat që përfiton buxheti i shtetit nga taksat e automjeteve pritet të arrijnë në rreth 33.8 miliardë lekë në vitin 2027, nga rreth 7.2 miliardë lekë që parashikohen për vitin 2026. Këto ndryshime propozohen në kuadër të rishikimit të taksimit të automjeteve dhe heqjes së taksës së qarkullimit për benzinën dhe naftën.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
