Shitjet e fermerëve përmes mekanizmit të autofaturës kanë shënuar rritje gjatë 10-mujorit të vitit 2026, duke arritur në 221 milionë euro. Sipas të dhënave të publikuara nga Administrata Tatimore, vlera e transaksioneve është rritur me 13% krahasuar me të njëjtën periudhë të vitit 2025.
Rritje ka regjistruar edhe numri i autofaturave të lëshuara, i cili është zgjeruar me 22% në raport me 10-mujorin e një viti më parë. Këto të dhëna tregojnë një shtim të transaksioneve të dokumentuara mes fermerëve dhe blerësve të regjistruar me TVSH.
Autofatura është mekanizmi përmes të cilit dokumentohen blerjet e produkteve bujqësore nga fermerët prej subjekteve të regjistruara me TVSH, duke mundësuar pasqyrimin e këtyre transaksioneve në sistemin tatimor.
Sipas Administratës Tatimore, rritja e vlerës së shitjeve dhe e numrit të autofaturave pasqyron ecurinë drejt formalizimit të aktivitetit ekonomik në bujqësi dhe rritjes së transparencës në këtë sektor. Kjo tendencë vjen në kuadër të iniciativave të ndërmarra për formalizimin dhe lehtësimin e aktivitetit të fermerëve.








