LIGJET E BIZNESIT
Viti 2027 pritet të nisë me buxhetin më të lartë të planifikuar ndonjëherë, me shpenzime që arrijnë në 976.1 miliardë lekë, ose rreth 10.7 miliardë euro. Sipas projektbuxhetit, shpenzimet publike do të përbëjnë rreth 33.3% të Prodhimit të Brendshëm Bruto (PBB), duke u rritur me 69.3 miliardë lekë krahasuar me planin e rishikuar për vitin 2026.
Të ardhurat buxhetore për vitin e ardhshëm parashikohen në 907.8 miliardë lekë, ose 30.9% e PBB-së. Krahasuar me planin e rishikuar të vitit 2026, ato pritet të rriten me rreth 57.2 miliardë lekë. Diferenca mes të ardhurave dhe shpenzimeve do të përbëjë deficitin buxhetor, i cili planifikohet në nivelin 2.3% të PBB-së, në të njëjtin nivel me atë të pritshëm për vitin 2026.
Një nga prioritetet e projektbuxhetit janë politikat sociale dhe rritja e mirëqenies. Për periudhën 2027–2029, parashikohen fondet për vijimin e politikës së rritjes së pensionit minimal në 200 euro në muaj dhe pensionit mesatar në 400 euro në muaj. Gjithashtu, parashikohet financimi i rishikimit të politikës së bonusit të bebes, me synimin për të ofruar edhe një pagesë mujore për fëmijët e moshës 0–5 vjeç.
Investimet publike për vitin 2027 parashikohen në rreth 201.5 miliardë lekë, ose 6.9% e PBB-së. Në këtë shumë përfshihen edhe rreth 14.1 miliardë lekë financime të pritshme mbi bazë projektesh nga Plani i Rritjes.
Ndërkohë, shpenzimet e buxhetit vendor parashikohen në 114.6 miliardë lekë, me një rritje prej 2.4% krahasuar me vitin 2026. Ato do të përbëjnë 3.9% të PBB-së. Transferta e pakushtëzuar për njësitë e qeverisjes vendore pritet të rritet me 1.4 miliardë lekë, ose 5.1%, krahasuar me vitin 2026. Sipas relacionit, financimi synon të mbështesë decentralizimin dhe zbatimin e reformës së re administrativo-territoriale, duke forcuar kapacitetet administrative dhe ofrimin e shërbimeve vendore.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Sa i përket qëndrueshmërisë fiskale, balanca primare parashikohet të jetë e balancuar në vitin 2027, në përputhje me rregullin fiskal që nuk lejon një balancë primare negative. Paralelisht, qeveria parashikon vijimin e uljes së borxhit publik bruto.
Sipas skenarit bazë, borxhi publik bruto pritet të zbresë nga rreth 52.5% e PBB-së në vitin 2026, në 52.4% në vitin 2027. Trajektorja rënëse parashikohet të vijojë në vitet pasuese, me borxhin që pritet të arrijë në 52.2% të PBB-së deri në vitin 2029 dhe në 50.9% në vitin 2031.
