LIGJET E BIZNESIT
Bordi i Transparencës ka përcaktuar çmimet e reja të shitjes së karburanteve në vend. Nafta do të tregtohet me jo më shumë se 211 lekë për litër, ndërsa benzina me 195 lekë për litër.
Bordi i Transparencës ka vendosur kufijtë e rinj të çmimeve të shitjes me pakicë dhe shumicë të karburanteve në Shqipëri. Sipas vendimit të datës 10 tetor 2026, çmimi i naftës nuk do të jetë më shumë se 211 lekë për litër në pikat e shitjes me pakicë, ndërsa benzina do të tregtohet me jo më shumë se 195 lekë për litër. Për shitjen me shumicë, çmimi maksimal i naftës është përcaktuar në 199 lekë për litër, ndërsa ai i benzinës në 183 lekë për litër.
Çmimet e reja hyjnë në fuqi më 10 tetor, në orën 12:30, dhe do të mbeten të vlefshme deri në mbledhjen e ardhshme të Bordit, kur do të rishikohen në varësi të ndryshimeve të çmimeve të shitjes. Vendimi është marrë në mbështetje të shpalljes së situatës së veçantë në tregun e hidrokarbureve, sipas vendimit të Këshillit të Ministrave nr. 711, datë 16 shtator 2026, si dhe kuadrit ligjor për tregtimin e naftës, gazit dhe nënprodukteve të tyre.
Bordi u ka rikujtuar operatorëve të tregtimit me shumicë dhe pakicë detyrimin për zbatimin e çmimeve të përcaktuara, duke paralajmëruar se në rast të konstatimit të shkeljeve mund të vendoset pezullimi i aktivitetit. Ministria e Ekonomisë dhe Inovacionit, Ministria e Financave dhe Ministria e Infrastrukturës dhe Energjisë deklarojnë se synojnë mbrojtjen e interesave të konsumatorëve dhe ruajtjen e konkurrencës së ndershme në tregun e karburanteve.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
