LIGJET E BIZNESIT
Shqipëria ka hyrë në fazën e zbatimit të Korridorit VIII, ndërsa fokusi tashmë është përkthimi i angazhimeve politike në projekte konkrete. Deklarata u bë nga ministri për Evropën dhe Punët e Jashtme, Ferit Hoxha, gjatë Konferencës për Korridorin VIII në Sofje, të organizuar nga ministrja e Jashtme e Bullgarisë, Velislava Petrova.
Konferenca pason takimin ministror të zhvilluar në Tiranë në shkurt, ku u përcaktua vizioni i përbashkët politik për avancimin e këtij korridori.
“Sot, në Sofje, fokusi ynë është i qartë, ta kthejmë angazhimin politik në zbatim konkret. Suksesi i Korridorit VIII nuk do të matet me deklarata, por me zbatimin. Për Shqipërinë, kjo do të thotë të ndërtojmë një korridor të vetëm, plotësisht funksional, dhe jo një seri projektesh kombëtare të palidhura”, u shpreh Hoxha.
Sipas ministrit, Korridori VIII përfaqëson më shumë se një projekt transporti, pasi synon të krijojë një lidhje strategjike Lindje-Perëndim, duke bashkuar Adriatikun me Detin e Zi dhe duke afruar ekonomitë, rrjetet energjetike dhe interesat e sigurisë së vendeve të rajonit.
Hoxha theksoi se përfundimi i korridorit pritet të përmirësojë lidhjet infrastrukturore, të nxisë tregtinë dhe investimet, si dhe të ulë kostot e transportit, duke rritur konkurrueshmërinë e ekonomive të përfshira.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Për vijimin e projektit, ministri kërkoi përcaktimin e një liste të qartë projektesh prioritare, afateve realiste dhe mekanizmave të monitorimit.
“Shqipëria nuk është vetëm e angazhuar; ne kemi kaluar në fazën e zbatimit. Do të bëjmë pjesën tonë për ta kthyer Korridorin VIII nga vizion në realitet”, deklaroi ministri.
Në fokus ishte edhe dimensioni i sigurisë, veçanërisht avancimi i lëvizshmërisë ushtarake dhe koordinimi mes Bashkimit Evropian dhe NATO-s për infrastrukturën me përdorim të dyfishtë.
