LIGJET E BIZNESIT
Ndryshimet e propozuara në Paketën Fiskale 2027 parashikojnë rishikimin e fashave të tatimit mbi pagat, me lehtësim për një pjesë të punonjësve dhe një normë më të lartë për të ardhurat nga pagat e larta. Sipas burimeve pranë Drejtorisë së Përgjithshme të Tatimeve, të dhënat për shpërndarjen e punonjësve sipas fashave të pagave tregojnë se 770,232 punonjës kanë paga bruto deri në 300 mijë lekë, 9,098 punonjës përfshihen në fashën nga 300,001 deri në 700 mijë lekë, ndërsa 1,293 punonjës rezultojnë me paga mbi 700 mijë lekë.
Sipas propozimit, kufiri i pagës bruto mujore që tatohet me normën 13% do të rritet nga 200 mijë në 300 mijë lekë. Për pjesën e pagës nga 300 mijë deri në 700 mijë lekë do të zbatohet norma 23%, ndërsa për të ardhurat mbi 700 mijë lekë parashikohet një normë marxhinale prej 32%. Rritja e kufirit të fashës së parë synon të ulë barrën tatimore për një pjesë të punonjësve. Sipas përllogaritjeve të publikuara, një pagë bruto prej 300 mijë lekësh mund të përfitojë një ulje tatimi prej rreth 10 mijë lekësh në muaj, ose 120 mijë lekësh në vit.
Ndërkohë, norma e re prej 32% do të zbatohet vetëm mbi pjesën e të ardhurave që kalon pragun përkatës dhe jo mbi të gjithë pagën. Efekti përfundimtar për punonjësit me paga mbi 700 mijë lekë do të varet nga niveli i pagës dhe zbatimi i fashave të reja. Ndryshimet janë pjesë e propozimeve për Paketën Fiskale 2027. Ndërsa Kryeministri Edi Rama ka folur për një normë prej 30% për pagat e larta, projektligji parashikon normën 32% për pjesën e të ardhurave mbi pragun e përcaktuar.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
