LIGJET E BIZNESIT
Bizneset dhe qytetarët po iu drejtohen bankave për realizimin e ivestimeve të tyre. të dhënat zyrtare tregojnë se në gjashtëmujorin e parë të këtij viti, kredia për sektorin privat u rrit me 14.3% në terma vjetorë, ndërsa raporti i saj ndaj PBB-së arriti në rreth 35%, niveli më i lartë i regjistruar në dekadën e fundit. Rritja e kreditimit ka qenë e pranishme si në segmentin e bizneseve, ashtu edhe në atë të individëve. Shifrat u bënë të ditura gjatë takimit të zhvilluar nga guvernatori i Bankës së Shqipërisë, Gent Sejko dhe ministrja e Ekonomisë dhe Inovacionit, Delina Ibrahimaj me drejtorët e përgjithshëm të bankave tregtare që operojnë në Shqipëri.
Takimi u përqendrua në zhvillimet më të fundit në veprimtarinë bankare, ecurinë e kreditimit, tregun e pasurive të paluajtshme, si dhe në çështje me rëndësi për stabilitetin dhe zhvillimin e mëtejshëm të sistemit financiar. Në fokus ishte mbështetja për bizneset mikro, të vogla dhe të mesme, përmes instrumenteve që lehtësojnë aksesin në financim, përfshirë edhe “Dyfisho sipërmarrjen tënde”, për të nxitur investimet dhe zgjerimin e aktivitetit.
“Bashkëpunimi me sektorin bankar është i rëndësishëm për të çuar më shumë financim drejt sipërmarrjes dhe ekonomisë”, ka theksuar ministrja Ibrahimaj.
Guvernatori Sejko vlerësoi se këto zhvillime krijojnë premisa që kreditimi të vijojë të mbështesë konsumin dhe investimet në ekonomi. Në të njëjtën kohë, ai theksoi rëndësinë që rritja e kredisë të vijojë në mënyrë të kujdesshme dhe të shëndetshme, duke ruajtur standarde të përshtatshme kreditimi dhe administrimi të rrezikut.
Një tjetër çështje e diskutuar ishin edhe zhvillimet në tregun e pasurive të paluajtshme dhe lidhja e tyre me aktivitetin kreditues. Diskutimet u fokusuan në ecurinë dhe dinamikën e këtij tregu, si dhe në zhvillimet e kreditimit për blerjen e banesave. Kredia hipotekare vijoi të shfaqë ritme të larta rritjeje, duke u zgjeruar me 16.1% në terma vjetorë gjatë gjashtëmujorit të parë të vitit 2026. Ndërkohë, norma mesatare e interesit për kreditë hipotekare në lekë qëndroi në nivelin 3.9%.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Në këtë kuadër, Guvernatori Sejko u ndal edhe në masat makroprudenciale të ndërmarra nga Banka e Shqipërisë për financimin e blerjeve në tregun e pasurive të paluajtshme, përmes vendosjes së kufijve të sipërm për kredidhënien për pasuri të paluajtshme rezidenciale, bazuar në raportet “kredi ndaj vlerës së pronës” dhe “shërbimi i borxhit ndaj të ardhurave”. Guvernatori vlerësoi se masat e marra kanë dhënë efektet e pritshme, duke kontribuuar në një kreditim më të kujdesshëm dhe të balancuar të tregut të banesave. Ai theksoi se këto masa mbështesin zhvillimin e shëndetshëm të kreditimit dhe forcimin e qëndrueshmërisë së sektorit bankar.
