LIGJET E BIZNESIT
Shqipëria synon të krijojë një sistem të ri për menaxhimin e baterive dhe mbetjeve të tyre, përmes një projektvendimi i cili është publikuar në Konsultime Publike, përafron legjislacionin vendas me kërkesat e Bashkimit Evropian. Nisma parashikon rregulla të reja për vendosjen e baterive në treg, grumbullimin, trajtimin, ripërdorimin dhe riciklimin e tyre, me synim mbrojtjen e mjedisit dhe shëndetit të njeriut. Projektvendimi përcakton detyrime për prodhuesit, importuesit, distributorët dhe operatorët ekonomikë, duke përfshirë kufizimin e substancave të rrezikshme, deklarimin e gjurmës së karbonit, përdorimin e materialeve të ricikluara dhe kërkesat për sigurinë e produkteve.
Një nga risitë është krijimi i pasaportës dixhitale të baterisë, që do të mundësojë gjurmueshmërinë e saj gjatë gjithë ciklit jetësor. Parashikohen gjithashtu mekanizma për përgjegjësinë e zgjeruar të prodhuesit, si dhe objektiva për grumbullimin dhe rikuperimin e materialeve. Sipas analizës financiare të projektaktit, në vitin 2026 në Shqipëri vlerësohet të jenë vendosur në treg rreth 7,423 ton bateri. Deri në vitin 2035, kjo sasi parashikohet të arrijë në rreth 10,292 ton.
Për krijimin e rrjetit kombëtar të grumbullimit të baterive portative, investimet fillestare vlerësohen në 250–350 mijë euro, për vendosjen e rreth 5 mijë pikave të grumbullimit. Ndërkohë, kostot vjetore të funksionimit të sistemit parashikohen të rriten nga rreth 700 mijë euro në vitin 2027, në mbi 5.4 milionë euro në vitin 2036. Financimi do të mbështetet te prodhuesit, importuesit dhe skemat e përgjegjësisë së zgjeruar të prodhuesit, pa parashikuar financim të drejtpërdrejtë nga buxheti i shtetit për grumbullimin, trajtimin dhe riciklimin.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
