LIGJET E BIZNESIT
Kryeministri Edi Rama ka preznatuar për publikun 10 pikat e Paketës Fiskale 2027, të miratuara nga qeveria në mbledhjen e sotme. Drafti i paketës fiskale shoqëron projektbuxhetin 2027 dhe të dyja dokumentat e rëndësishme fiskalë do t’i kalojnë për miratim parlamentit.
“Lajmi i parë është se falë rritjes së ekonomisë dhe mundësive, jemi gati për të hedhur një hap për familjet e zakonshme. Ulim normën e TVSH-së për ushqimet bazë, nga 20% në 6%. Vetëm me këtë lëvizje, ne shtojmë në arkën e familjeve shqiptare rreth 150 mln euro në vit për ushqimin. Praktika për pasqyrën e çmimeve do të zgjerohet, për të garantuar që shporta të jetë e mbrojtur nga abuzuesit e mëdhenj. Nuk rrisim normën e tatim-fitimit të sipërmarrjes, që ngel 15%. Ne tatojmë të mëdhenjtë me normën më të lartë për Ballkanin Perëndimor. Sot rrisim edhe tatimin mbi dividendin e tyre. Duke shkuar nga 8% në 15%, i taton biznesmenët e mëdhenj me një taksë më të ndershme. Ulim barrën tatimore. Këtë lëvizje nuk na e lejonte ekonomia deri dje. Sot rritja e ekonomisë na jep mundësinë. Vendosim një prag të ri tatimi, ku norma e tatimit bëhet 30%.
Në radhë të parë, si një instrument për t’i mbyllur shtegun evazionit të dividendit. Ndërkohë qëndron i paprekur zotimi ynë publik. Taksa zero për fitimin e biznesit të vogël deri në vitin 2029. Ka ardhur koha e një sistemi të ri taksimi të ekonomisë digjitale, duke nisur nga ata që jetojnë shumë mirë me like e folloë. Paralelisht po punohet edhe për disa masa të reja që shkojnë po në këtë drejtim. Solidaritet me ata që e ndiejnë më shumë presionin e rritjes së kostove të jetesës.
Një supertaksë prone për ata që blejnë dhe mbajnë apartamente bosh, duke refuzuar t’i japin me qira. Një supertaksë prone për vilat në bregdet. Edhe ata duhet të paguajnë më shumë për pronën e tyre dhe një çmim i shumëfishuar për ujin e pishinave. Kjo shkon në një tjetër ligj. Do të ketë dhe një supertaksë për makinat e luksit. Pranë Ministrisë së Financave do të krijohet edhe Byroja e Specializuar për kontrollin e të ardhurave”, u shpreh Rama.
Kreu i qeverisë ka njoftuar edhe heqjen e taksës së qarkullimit për automjetet në pompë dhe pagesën e kësaj takse tek automjetet. Qeveria do të vendosë gjithashtu, një taksë të re qarkullimi për makinat e huaja që futen në territorin shqiptar.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Projektbuxheti 2027 dhe paketa fiskale që e shoqëron pritet të dorëzohen në Kuvend, ku fillimisht do të bëhet diskutimi në parim I tyre përpara miratimit në Seancë plenare po në parim, process që do të vijojë me diskutimin dhe miratimin nen për nen.
