LIGJET E BIZNESIT
“Nga identiteti tek ndikimi: Fuqia e gruas shqiptare në diasporë për një Shqipëri Evropiane”. Është kjo tema e edicionit të gjashtë të Samitit të Gruas Shqiptare në Diasporë, që do të zhvillohet më 23 tetor në Tiranë. Një Samit i shndërruar tashmë në traditë dhe që organizohet nga Dhoma e Biznesit të Diasporës në bashkëpunim me Ministrinë për Evropën dhe Punët e Jashtme, Agjencinë Kombëtare të Diasporës, GIZ Shqipëri dhe partnerë të tjerë.
Tirana do të bëhet pikëtakimi i grave shqiptare nga Shqipëria dhe diaspora, në një aktivitet që synon bashkëpunimin, rrjetëzimin dhe shkëmbimin e eksperiencave mes grave shqiptare në vend dhe jashtë tij. Samiti i Gjashtë i Gruas Shqiptare në Diasporë vjen këtë vit me një fokus të veçantë: rolin që gratë shqiptare jashtë vendit mund të luajnë në ndërtimin e një Shqipërie evropiane.
Dhoma e Biznesit të Diasporës synon të sjellë në Tiranë mbi 150 gra shqiptare nga vendi dhe diaspora, së bashku me përfaqësuese të institucioneve, biznesit, akademisë dhe organizatave ndërkombëtare. Në aktivitet pritet të jenë të pranishme edhe figura të njohura të jetës publike, si dhe gra të suksesshme të biznesit shqiptar në vend dhe në diasporë.
Samiti i Gruas Shqiptare në Diasporë, një histori suksesi
Samiti i Gruas Shqiptare në Diasporë e nisi rrugëtimin në vitin 2020, me nismën e ish ministrit për Diasporën Pandeli Majko në bashkëpunim me Dhomën e Biznesit të Diasporës. Samiti synonte krijimin e një hapësire, ku gratë shqiptare nga Shqipëria dhe jashtë saj të mund të njiheshin, të ndanin eksperiencat dhe të krijonin lidhje të reja.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Gjatë viteve, aktiviteti është zhvilluar dhe zgjeruar, duke kaluar nga fokusi te sipërmarrja dhe rrjetëzimi, drejt çështjeve më të gjera që lidhen me zhvillimin e qëndrueshëm, inovacionin, digjitalizimin, lidershipin, bashkëpunimin institucional dhe Evropën. Në edicionet e mëparshme janë krijuar dhe konsoliduar rrjete të rëndësishme të grave shqiptare në diasporë.
Edicioni i gjashtë i Samitit të Gruas Shqiptare në Diasporë vjen në një moment të rëndësishëm për Shqipërinë, veçanërisht në raport me procesin e integrimit evropian. Këtë vit, fokusi synon të shkojë përtej ruajtjes së lidhjes identitare me Shqipërinë. Në qendër do të jetë pyetja se si përvoja, njohuritë, rrjetet profesionale, investimet dhe kapitali njerëzor i shqiptarëve jashtë vendit, dhe veçanërisht i grave shqiptare, mund të shndërrohen në një forcë konkrete për zhvillimin dhe integrimin evropian të vendit. Gratë shqiptare në diasporë janë sot pjesë e tregjeve, kompanive, universiteteve dhe institucioneve në Evropë dhe në botë. Ato kanë krijuar rrjete dhe eksperienca që mund të shërbejnë si ura të reja mes Shqipërisë dhe Evropës.
Samiti që do të zhvillohet më datë 23 tetor në hotel Marriott (salla Bylis) në Tiranë dhe synon të sjellë histori, eksperienca dhe zëra të ndryshëm të grave shqiptare nga bota, duke krijuar një hapësirë për të diskutuar jo vetëm atë që është arritur deri tani, por edhe atë që mund të ndërtohet më tej.
