LIGJET E BIZNESIT
Inteligjenca artificiale po ndryshon mënyrën se si kryhen profesionet, duke automatizuar një pjesë të detyrave që deri më sot realizoheshin nga punonjësit. Një raport i Bankës Botërore paralajmëron se ndikimi i kësaj teknologjie në tregun e punës po zgjerohet, me pasoja të mundshme veçanërisht për të rinjtë dhe personat me arsim të lartë.
Sipas raportit, rreth një në pesë punonjës në rajonin e Europës dhe Azisë Qendrore ushtron një profesion që është ndjeshëm i ekspozuar ndaj inteligjencës artificiale. Ndër profesionet që po përballen me ndryshime janë punonjësit e administratës, operatorët e qendrave të telefonatave, kontabilistët, përkthyesit, gazetarët dhe programuesit.
Megjithatë, ekspozimi ndaj inteligjencës artificiale nuk nënkupton domosdoshmërisht humbjen e vendit të punës. Teknologjia mund të automatizojë detyra të caktuara, por gjithashtu mund të ndryshojë mënyrën e organizimit të punës dhe aftësitë që kërkohen nga punonjësit.
Pavarësisht përhapjes së kësaj teknologjie, bizneset në rajon vijojnë ta përdorin atë në një masë të kufizuar. Sipas Bankës Botërore, më pak se 10% e kompanive e kanë integruar inteligjencën artificiale në aktivitetin e tyre, kryesisht për komunikimin me klientët, përgatitjen e dokumenteve dhe përpunimin e informacionit.
Një tjetër zhvillim i evidentuar në raport është rritja e kërkesës për aftësi në inteligjencën artificiale, e cila është pothuajse katërfishuar. Kjo tregon se njohuritë teknologjike po marrin një rol gjithnjë e më të rëndësishëm në tregun e punës.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Banka Botërore thekson se përfitimet nga inteligjenca artificiale do të varen nga aftësia e vendeve për të përgatitur punonjësit dhe për të mbështetur bizneset në adoptimin e teknologjisë. Në këtë drejtim, investimet në aftësitë digjitale dhe përshtatja e sistemeve arsimore me kërkesat e reja të tregut konsiderohen thelbësore për të përballuar transformimin e profesioneve në vitet e ardhshme.
