LIGJET E BIZNESIT
Kryeministri Edi Rama dhe ministrja e Ekonomisë dhe Inovacionit, Delina Ibrahimaj, kanë prezantuar platformën “Pasqyra e Çmimeve” dhe nismën “KURSE”, dy mekanizma që synojnë t’u japin konsumatorëve më shumë informacion mbi çmimet e produkteve ushqimore dhe mundësi për të kursyer në blerjet e përditshme.
Platforma “Pasqyra e Çmimeve” do t’u mundësojë qytetarëve të krahasojnë çmimet e produkteve në rrjete të ndryshme supermarketesh, përmes telefonit ose kompjuterit, duke identifikuar ofertat më të favorshme për shportën e tyre ushqimore.
Sipas ministres Ibrahimaj, në këtë nismë janë përfshirë pesë rrjete supermarketesh, ndërsa aktualisht platforma përmban 13 kategori produktesh, mes të cilave sheqer, vaj, miell, drithëra, makarona, fasule, thjerrëza, kos, vezë, gjalpë dhe pulë.
Kryeministri Rama bëri të ditur se në platformë janë pasqyruar më shumë se 200 artikuj, ndërsa objektivi është që numri i tyre të kalojë 1,000 deri në fund të vitit. Ai theksoi se synimi është që nismës t’i bashkohen gjithnjë e më shumë subjekte tregtare, përfshirë edhe pikat e shitjes me pakicë. Sipas Ramës, qasja e zgjedhur nuk është vendosja e çmimeve nga qeveria, por rritja e transparencës dhe nxitja e konkurrencës mes subjekteve tregtare.
Paralelisht, qeveria ka prezantuar edhe nismën “KURSE”, e cila parashikon që 212 produkte të ofrohen me çmime të fiksuara deri më 12 janar, sipas afatit të bërë të ditur gjatë prezantimit.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Ministrja Ibrahimaj deklaroi se, përveç rrjeteve të supermarketeve, në nismë janë angazhuar edhe 22 furnitorë, të cilët do t’i shesin produktet me marzhe minimale fitimi. Përmes këtyre dy mekanizmave, synohet që konsumatorët të kenë më shumë mundësi për të krahasuar çmimet, për të zgjedhur ku do të kryejnë blerjet dhe për të planifikuar më mirë shpenzimet familjare.
