Çfarë preferojnë shqiptarët në internet? Të rinjtë, filmat dhe muzikën. Të moshuarit, aplikacionet e shëndetit

Përdorimi i internetit në Shqipëri ndryshon ndjeshëm sipas moshës, duke reflektuar interesa dhe nevoja të ndryshme të përdoruesve. Sipas të dhënave të INSTAT për vitin 2025, të rinjtë janë përdoruesit më aktivë të platformave të argëtimit dhe lojërave online, ndërsa grupmoshat më të mëdha e përdorin internetin më shpesh për informim dhe çështje që lidhen me shëndetin.

Muzika dhe shërbimet e transmetimit janë ndër aktivitetet më të përhapura në internet. Në nivel kombëtar, 36.7% e përdoruesve të internetit kanë dëgjuar muzikë ose kanë përdorur shërbime të ngjashme gjatë tre muajve të fundit. Megjithatë, te të rinjtë 16–24 vjeç kjo përqindje arrin në 75.6%, ndërsa bie në 20,6% për grupmoshën 25–54 vjeç dhe në vetëm 18,3% për personat 55–74 vjeç.

Një prirje e ngjashme vihet re edhe për filmat dhe serialet. Mbi tetë në dhjetë të rinj (80.3%) kanë ndjekur përmbajtje përmes platformave online ose kanë shkarkuar filma dhe seriale, krahasuar me 26% të grupmoshës 25–54 vjeç dhe 21.5% të atyre 55–74 vjeç.

Leximi i e-librave, gazetave apo revistave online është më i balancuar mes grupmoshave. Në total, 25.8% e përdoruesve kanë shfrytëzuar internetin për këtë qëllim. Edhe pse të rinjtë kryesojnë me 44%, diferencat me grupmoshat e tjera janë më të vogla krahasuar me aktivitetet argëtuese.

Edhe lojërat online mbeten një aktivitet i lidhur kryesisht me të rinjtë. Sipas INSTAT, 71.5% e personave 16–24 vjeç kanë luajtur lojëra ose kanë shkarkuar lojëra për telefon, tablet dhe kompjuter. Përqindja ulet në 28.7% për grupmoshën 25–54 vjeç dhe në 19.1% për personat 55–74 vjeç.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Ndërkohë, një nga aktivitetet ku grupmosha më e madhe rezulton më aktive është përdorimi i aplikacioneve që lidhen me shëndetin ose mirëqenien fizike. Në grupmoshën 55–74 vjeç, 24.2% kanë përdorur aplikacione të tilla, duke tejkaluar të rinjtë.

Të dhënat tregojnë gjithashtu se dallimet mes grave dhe burrave në përdorimin e internetit për qëllime kulturore janë relativisht të vogla. Meshkujt përdorin më shpesh internetin për muzikë, filma dhe lojëra online, ndërsa gratë rezultojnë pak më aktive në leximin e e-librave, gazetave dhe revistave online, si edhe në përdorimin e aplikacioneve që lidhen me shëndetin./Tv Scan