Pjeshkët e kontaminuara, ish ministri: Mund të jenë konsumuar në Shqipëri, ekspertja: Jemi vite dritë larg BE

Në Terminal me Aurora Sulçen, temë diskutimi ishte dhe siguria ushqimore dhe bllokimi i disa produkteve bujqësore shqiptare nga vendet e BE.

Për ish-ministrin Panariti, ekziston mundësia që këto produkte, të fundit prej të cilave ishin pjeshkët mund të jenë konsumuar edhe nga qytetarët shqiptarë, pasi nuk ka diferencim.

“Të njëjtat produkte mendoj se janë shpërndarë dhe në tregjet tona, njësoj si kanë shkuar për eksport dhe janë bllokuar. Këto produkte mund të jenë konsumuar dhe nga shqiptarët”, tha Panariti.

Ndërkohë, që ekspertja Esmeralda Ballesha deklaroi se përsa i përkeq sigurisë ushqimore Shqipëria është vite dritë larg BE, teksa shtoi se përmirësimi i këtij problemi do të kushtojë shumë para.

“Jemi dritë yje larg BE. Ne kapemi me AKU por është një pjesë e vogël e hallkave të gjurmueshmërisë. Siguria ushqimore kushton shumë. Do i kushtojë qeverisë. Teste, trajnime, sistemit të gjurmueshmërisë. Nuk ka rëndësi brenda apo jashtë. Siguria ushqimore është çështje kombëtare”, tha Ballesha./A2 CNN