LIGJET E BIZNESIT
Autoriteti Kombëtar për Sigurinë Kibernetike ka reaguar ndaj skemave mashtruese on line. Një qëndrim që vjen pas shqetësimit të ngritur nga deputeti i Partisë Socialiste, Erion Braçe.
“Kjo platformë, e prezantuar si aplikacion për investime në kriptovaluta, nuk është e regjistruar dhe nuk është e licencuar në Republikën e Shqipërisë dhe si e tillë operon jashtë çdo kuadri ligjor kombëtar. Nga vëzhgimet tona dhe nga denoncimet e shumta të bëra publike, konstatohet se aktiviteti i saj mbart tiparet e qarta të një skeme mashtruese digjitale”, ka deklaruar Autoriteti Kombëtar për Sigurinë Kibernetike.
Qindra qytetarë shqiptarë po bien pre skemave të reja piramidale, ku u propozohet të blejnë kriptomonedha që nuk ekziston ose u kërkohet që të investojnë para me pretendimin se brenda 45 ditësh ato do të marrin 2-fishin e parave të hedhura. Dhe TXEX nuk është platforma e vetme që po zhvat shqiptarët.
“Përveç TXEX janë dhe 2 platforma të tjera të ngjashme XUEXA dhe Grokrexduu. AKSK ka marrë masa urgjente për bllokimin e aktivitetit të këtyre faqeve mashtruese në territorin e Republikës së Shqipërisë, duke bashkëpunuar ngushtësisht me institucionet përgjegjëse AKEP, Policinë e Shtetit dhe ofruesit e shërbimeve të internetit”, thekson Autoriteti Kombëtar për Sigurinë Kibernetike
Joshja për të fituar sa më shumë e më shpejt është “mikrob” që me sa duket, gjendet në mendjen e çdo njeriu dhe mekanizmave të funksionimit të çdo shoqërie. Por Autoriteti Kombëtar për Sigurinë Kibernetike tregon se çfarë ndodh me ata që investojnë.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
“Humbje financiare të parikuperueshme, rrezik të lartë për cenimin e privatësisë dhe identitetit digjital, mundësi për keqpërdorim të mëtejshëm të të dhënave personale nga rrjete kriminale”, vë në dukje Autoriteti.
Ndërkohë Policia e Shtetit ka nisur zyrtarisht një hetim në lidhje me skemat mashtruese online, të cilat dyshohet se i kanë zhvatur qytetarëve shqiptarë rreth 5 milionë euro, përmes premtimit për fitime të majme duke investuar në blerje kriptovalutash. Në qershor ishte Autoriteti i Mbikëqyrjes Financiare paralajmëroi qytetarët shqiptarë se një platformë e dyshimtë investimesh, e quajtur “NetherexPro”, po promovohej në rrjetet sociale dhe mund të rrezikojë të ardhurat e tyre.
