Kufiri mes Shqipërisë dhe Maqedonisë së Veriut do të funksionojë tashmë përmes një sistemi të integruar kontrolli me një ndalesë të vetme. Sistemi i ri “One Stop Shop”, i inauguruar në pikën kufitare të Qafë Thanës, synon të reduktojë kohën e pritjes dhe të lehtësojë lëvizjen e qytetarëve, automjeteve dhe mallrave mes dy vendeve.
Në ceremoninë e përurimit morën pjesë kryeministri Edi Rama dhe homologu i tij i Maqedonisë së Veriut, Hristijan Mickoski. Gjatë fjalës së tij, kryeministri Rama e cilësoi këtë sistem si një transformim të rëndësishëm, që do t’u shërbejë miliona njerëzve që kalojnë përmes kësaj pike kufitare. Ai bëri të ditur se modeli i kontrollit të përbashkët do të shtrihet edhe në pika të tjera kufitare.
“Deri tani në këtë doganë ishim kontrollo-kontrollo. Tani jemi beso-kontrollo. Hapi tjetër është beso-beso, që të mos kemi më asnjë kontroll këtu në rrugëtimin tonë të përbashkët për t’u bërë pjesë e Europës pa kontrolle në kufijtë mes nesh”, u shpreh Rama.
Kreu i qeverisë shqiptare theksoi gjithashtu rëndësinë e bashkëpunimit mes dy vendeve në projekte të përbashkëta infrastrukturore, duke veçuar avancimin e Korridorit VIII si një prej prioriteteve. Nga ana e tij, kryeministri i Maqedonisë së Veriut, Hristijan Mickoski, e vlerësoi këtë bashkëpunim si një hap që lehtëson lëvizjen e qytetarëve dhe shprehu nevojën për ta zgjeruar modelin edhe në pikat e tjera të kalimit kufitar.
Sistemi “One Stop Shop” parashikon kryerjen e kontrolleve kufitare në një pikë të vetme, duke shmangur ndalesat e përsëritura në të dyja anët e kufirit. Ky mekanizëm synon të përmirësojë qarkullimin ndërkufitar, të reduktojë vonesat dhe të lehtësojë transportin e udhëtarëve dhe mallrave mes Shqipërisë dhe Maqedonisë së Veriut.







