LIGJET E BIZNESIT
Tarifat e presidentit të Shteteve të Bashkuara të Amerikës nuk po prekin vetëm tregtinë e jashtme, por edhe vlerën e arit, një trend që reflektohet edhe në të dhënat e Bankës së Shqipërisë.
Sipas statistikave të fundit, në fillim të këtij viti, vlera e arit në rezervat e Bankës së Shqipërisë arriti në 292 milionë euro. Krahasuar me muajin e fundit të vitit të kaluar, kjo vlerë u rrit me 7%.
Kjo rritje lidhet drejtpërdrejt me çmimin e arit në tregjet ndërkombëtare, i cili ka arritur nivele rekord. Një onz po këmbehet me 3,030 dollarë, duke shënuar një tjetër rritje historike.
Efekti zinxhir i tarifave të Trump në tregun e arit
Ndikimi i tarifave të vendosura nga administrata Trump ndaj Kinës dhe Meksikës po ndihet edhe në tregun global të arit. Sipas një artikulli të publikuar nga media ndërkombëtare “CNBX”, çmimi i arit ka thyer rekorde kryesisht për shkak të konflikteve gjeopolitike dhe politikave proteksioniste të SHBA-së.
“Çmimet e arit arritën një rekord të ri mbi kufirin kritik prej 3,000 dollarësh të martën, për herë të dytë brenda një jave, ndërsa investitorët kërkuan siguri përballë shqetësimeve ekonomike të nxitura nga tarifat e vendosura nga Presidenti i SHBA-së, Donald Trump,” – citohet në lajmin e publikuar nga “CNBX”.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
E thënë ndryshe, në momente pasigurie ekonomike dhe gjeopolitike, investitorët dhe qytetarët priren të investojnë në ar, pasi ai ruan vlerën dhe funksionon si një aset i sigurt. Vlera e arit filloi të rritet tre vite më parë për shkak të krizave të para gjeopolitike, por tarifat e Trump i kanë dhënë një hov edhe më të madh, duke krijuar një efekt zinxhir në ekonominë globale dhe duke ndikuar edhe në rritjen e vlerës së arit në Bankën e Shqipërisë.
