SKANDALI/ Vodhën ndihmat për të prekurit nga tërmeti, arrestohen shefi i rendit në Rinas, një polic dhe një zjarrëfikës (VIDEO)

Ditën e sotme janë arrestuar dy shefa policie dhe një punonjës i  Shërbimit të Zjarrëfikëses pasi akuzohen se kanë përvetësuar një sasi të konsiderueshme pakosh ushqimore, të cilat ishin ndihma për banorët që u prekën nga tërmeti 6.4 ballë i 26 nëntorit.

Mësohet se në pranga kanë rënë: A.Z me detyrë shefi i Seksionit të Rendit pranë Komisariatit Rinas, E.H., komandant skuadre tek Seksioni i Rendit në Rinas dhe A.T., me detyrë punonjës i shërbimit zjarrfikës pranë PMNZSH Kombinat.  Mbi ta rëndon akuza për ” mashtrim në bashkëpunim”.

Uniformat blu bëjnë me dije se procedimi i tyre u krye pas hetimeve që janë bërë në lidhje me publikimin e një videoje që qarkulloi në media.

NJOFTIMI ZYRTAR I POLICISE

SHÇBA arreston 2 punonjës policie, 1 punonjës të Shërbimit Zjarrfikës, si edhe procedon penalisht 2 shtetase për veprat penale të “Mashtrimit” dhe “Shpërdorimit të detyrës”.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Shërbimi për Çështjet e Brendshme dhe Ankesat ka arrestuar mbrëmë në flagrancë shtetasit:

– A.Z., me detyre Shef i Seksionit të Rendit pranë Komisariatit të Policisë Rinas, për veprën penale të “Mashtrimit në bashkëpunim”;

– E.H., me detyrë Komandant skuadre në Seksionin e Rendit pranë Komisariatit të Policisë Rinas për veprën penale “Shpërdorim detyre”;

– A.T., me detyrë punonjës i shërbimit zjarrfikës pranë PMNZSH Kombinat, për veprën penale të “Mashtrimit, e kryer në bashkëpunim”.

Gjithashtu janë proceduar në gjendje të lirë shtetaset V.Z. dhe Sh.T. për veprën penale të “Mashtrimit”, kryer në bashkëpunim.

Procedimi i tyre u krye pas hetimeve të zhvilluara në lidhje me publikimin e një video në media, ku shfaqeshin pamje të transportimit e përvetësimit të një sasie të konsiderueshme pakosh ushqimore (të sekuestruara në cilësinë e provës materiale) të destinuara për banorët e prekur nga situata e tërmetit.

Ndërkaq, materialet hetimore proceduriale do t’i dërgohen Prokurorisë Tiranë për hetime të mëtejshme.

SHÇBA fton çdo qytetar të denoncojë në numrin jeshil 0800 90 00, për çdo rast abuzimi të punonjësve të Policisë së Shtetit, duke garantuar reagim të shpejtë e në kohë.