Ngritja e SPAK, vjen reagimi ndryshe i PD: Shqipëria ka një shans të ri…

Pas ceremonisë së betimit në presidencë paraditen e sotme të 8 anëtarëve të SPAK që do të luftojnë korrupsionin dhe krimin e organizuar në vend, ka ardhur dhe reagimi i Partisë Demokratike.

PD përshendet betimin e prokurorëve dhe shton se tani është koha që të hetohen zyrtarët e lartë të korruptuar.

Ndër të tjera thuhet se Shqipëria ka një shans të rid he real për të luftuar krimin e organizuar dhe korrupsionin në nivelet më të larta, nga kriminelët me mbështetje qeveritare e deri te politikanët dhe zyrtarët e lartë.

PD i bën thirrje prokurorëve që të ngrihen në lartësinë e detyrës dhe të përmbushin pritshmëritë e shqiptarëve për  ti dhënë fund pandëshkueshmërisë së krimit të organizuar, promovuesve të kriminelëve në politikë dhe zyrtarëve të korruptuar.

Në fund PD ka falenderuar SHBA për ndihmën e dhënë deri më tani në bërjen funksionale të SPAK dhe për gatishmërinë e treguar për të vijuar mbështetjen për funksionimin e pavarur të SPAK.

REAGIMI I PLOTE I PARTISE DEMOKRATIKE

Partia Demokratike përshendet fillimin e punës së SPAK-ut dhe mbështet funksionimin e pavarur të kësaj strukture.  Fillimi menjëherë nga puna dhe ndëshkimi i krimit të organizuar dhe korrupsionit duhet të bëhet në mënyrë profesionale, të paanshme dhe të vendosur. Partia Demokratike, e cila ka miratuar ligjin për ngritjen e SPAK dhe të Byrosë Kombëtare të Hetimit, ka vullnetin për t’i dhënë besim dhe për të mos paragjykuar asnjë prej prokurorëve në përbërje të kësaj strukture, pavarësisht vendimeve të disa prej tyre, në të shkuarën.

Është koha që prokurorët të ngrihen në lartësinë e detyrës dhe të përmbushin pritshmërinë e qytetarëve shqiptarë për t’i dhënë fund pandëshkueshmërisë së krimit të organizuar, promovuesve të kriminelëve në politikë dhe zyrtarëve të korruptuar. Shqipëria ka një shans të ri dhe real për të luftuar krimin e organizuar dhe korrupsionin në nivelet më të larta, nga kriminelët me mbështetje qeveritare, tek politikanët dhe zyrtarët e lartë.  Partia Demokratike falenderon Shtetet e Bashkuara të Amerikës për ndihmën e dhënë deri më tani për bërjen funksionale të SPAK dhe për gatishmërinë e treguar për të vijuar mbështetjen për funksionimin e pavarur të SPAK.