“Disa nuk i vrau tërmeti po shteti” thirrja e fortë e Berishës: Të ngrihemi kundër Ramës, kërkon të varë fjalën e lirë

Ish-kryeministri Sali Berisha ishte sot i pranishëm në eventin e Akademisë Politike të FRPD, ku ka sulmuar kryeministrin Edi Rama duke e quajtur një fatkeqësi dhe emergjencë njësoj si tërmeti që goditi vendin më 26 nëntor.

Ai lëshoi akuza të forta në drejtim të Ramës edhe për paketën “Anti-shpifje” duke thënë se njësoj si i ati që firmosi varjen në litar të poetit Havzi Nela, sot tenton të varë në litar mediat online dhe fjalën e lirë.

Duke qenë se aty ndodheshin dhe zyrtarë e përfaqësues të CDU-së gjermane, Berisha ftoi në Tiranë deputetë të kësaj force politike për të parë zhvillimet që ndodhin këtu jashtë imagjinatës.

“Ai që dhunon fjalën e lirë është i aftë të kryejë çdo krim, dhe ky në Shqipëri është Edi Rama. Ky është kthyer në genet e të atit të tij, nuk marr unë përgjegjës kurrë djalin për babën, por kur djali manifeston në mënyrë identike…I ati i tij firmoste varjen e poetit Havzi Nela, pra varte fjalën e lirë. I biri i tij në vitin 2019 do të varë portalet. Ka sjellë në parlament ligjin, që sillet si xhelat ndaj fjalës së lirë. Ky është emergjencë kombëtare, po aq sa është edhe tërmeti.

Shumë mirënjohës për rezolutën në Zagreb. Por e konsideroj urgjente një mision në Tiranë, sepse këtu ka zhvillime jashtë imagjinatës. Ju mund të na ndihmoni më shumë. Ne duam që të vijnë edhe nga grupet e ndryshme parlamentare, jo vetëm të CDU, dhe të shohin këtu sesi një Narcos sillet ndaj të drejtave të shqiptarëve, se si ky njeri bën spastrim etnik.

E dini ju se një pjesë e vrasjeve të tërmetit, janë vrasje shtetërore. Se pallatet e Thumanës ishin të pabanueshme nga tërmeti i 21 shtatorit, dhe ata banorë nëse do ishin strehuar në një vend tjetër, do ishin gjallë të 24. A e patë ju një video të një gruaje të moshuar, i kishte ardh djali nga Italia, i kishte blerë një shtëpi të vogël 20 mijë euro, dhe ajo falenderonte djalin se i shpëtoi jetën duke e hequr nga pallatet e vdekjes.

Të ngrihemi fuqishëm, se tërmeti ishte një fatkeqësi natyrore, Edi Rama është një fatkeqësi kombëtare, sociale e të gjitha llojeve.”, deklaroi Berisha.