Në termetin e fuqishëm 6.4 ballë të 26 nëntorit, që goditi Shqipërinë duke lënë pas 51 viktima dhe mbi 900 të plagosur, pati persona që fillimisht u nxorrën me shenja jetë nga rrënojat më pas nuk mundën të mbijetonin në spital.
Në lidhje me këtë fenomen ka folur edhe drejtori i Spitalit të Traumës Arben Zenelaj.
I ftuar në studion “ABC-ja e mëngjesit”, Zenelaj tregoi se spitali i Traumës priti një numër të konsiderueshëm të pacientëve që mbetën të plagosur në tërmeti i 26 nëntorit.
Më pas ai shtoi se brenda një ore stafi në spital u dyfishua si pasojë e mbingarkesës.
I pyetur nga moderatori Enkel Demi, konkretisht për rastin e Saimir Grekut, i cili doli fillimisht gjallë nga rrënojat e më pas humbi jetën në spital, mjeku u shpreh se kjo vjen nga dëmtimi i indeve.
“Kryesisht pacientët që qëndrojnë për një periudhë të gjatë nën pesha të rënda, mund t’i rezistojnë transportit, por ndryshimet në qeliza janë të parikuperueshme, reagojnë indet e buta, nuk mjaftojnë vetëm thyerjet, muskujt, ligamentet që shkaktojnë dëmtime të tilla që reagojnë te veshkat. Reagojnë duke prodhuar toksina që bllokojnë funksionimin e veshkave,” u shpreh Zenelaj.
