Tre ditë pas tërmetit të fuqishëm 6.4 ballë, rrjeti ndërkombëtar mediatik “Al Jazeera” ka shkruar një reportazh të gjatë për situatën dramatike që po kalon vendi ynë.
Pas lëkundjeve fatale që shkaktuan 49 të vdekur dhe mbi 800 të plagosur, media e njohur raporton se Durrësi është braktisur tashmë nga banorët pas tërmetit të fortë.
“Paslëkundjet e vazhdueshme kanë terrorizuar qytetin me 200 mijë banorë, që është kthyer në një qytet fantazmë”- shkruan “Al Jazeera”.
Për Në mikrofonin e “Al Jazeera” kanë folur kryetari i Partisë Demokratike, Lulzim Basha dhe Presidenti i Republikës, Ilir Meta. Lideri i selisë blu thotë se gjysma e qyteti është evakuuar, ndërsa qindra banorë të traumatizuar janë shtruar për ndihmë në spitale.
“Gjysma e qytetit është evakuuar tashmë. Njerëzit janë të terrorizuar. Qindra janë shtruar në spital dhe qindra familje kanë humbur shtëpitë e tyre”-tha Basha.
Më tej kjo media tregon edhe planin e qeverisë, ku thotë se ka nisur inspektimi menjëherë në terren për të bërë verifikimin e banesave, ndërsa ky proces shton ajo, pritet të zgjasë me ditë të tëra pasi krahas Durrësit ka shumë banesa të dëmtuara edhe në kryeqytet.
“Është e qartë se disa nga këto ndërtime ishin totalisht jashtë standardeve të sigurisë,”- tha presidenti Ilir Meta për rrjetin “Al Jazeera”.
Meta shtoi faktin se për këtë duhet të behet një hetim i thellë dhe konkret.
