Kryetari i Partisë Demokratike Lulzim Basha ditën e sotme ndodhet në Myzeqe të Lushnjes nga ku po mban një takim me fermerët e zonës.
Ndër të tjera ai ka komentuar dhe situatën e ndërlikuar që po krijohet në Gjykatën Kushtetuese duke akuzuar kryeministrin Edi Rama se po kërkon të kapë drejtësinë për hesap të Rrumëve me shokë që i mbushin atij xhepat.
Ai ka folur ndër të tjera dhe për lidhjen e krimit dhe mafias shqiptare me politikanë e zyrtarë të lartë , ku ka folur dhe me emra dhe ka kujtuar gjithashtu deklaratën e fortë të prokurorit të Anti-mafias Federico Cafiero De Raho bërë disa ditë më parë në Tiranë, i cili u shpreh se Ndrageta ka lidhje të forta në Shqipëri.
“Për hesap të Rrumëve me shokë që mbushin xhepat e Edi Ramës jemi ketu ku jemi me një parlament të paligjshëm, me një me qeveri të paligjshme, me kryetarë bashkishë të paligjshëm, me Gjykatë Kushtetuese të paligjshme, me prokurorë të paligjshëm, ku e gjithë struktura shtetërore vepron për të mbushur xhepat e një grushti njerëzish. Aldo Baret me shokë kanë emëruar të gjithë kupolën në Tiranë dhe Lushnje duke punuar për bandën e Lushnjes sepse edhe pse jane tek 313 punët i kryejnë qe andej, i dëgjuat ambasadorët perendimore”- tha Basha, duke shtuar “E dëgjuat kreun e antimafias i cili tha se krimi i organizuar dhe mafia shqiptare bashkëpunojne ngushtë me politikanët dhe zyrtarët shqiptarë. Për kë e kishte fjalën? Për keta e kishte fjalën, partnerët e Aldo Bares me shokë. Kanë ngrënë e kanë pirë bashkë. I kanë bërë votat bashkë ndaj nuk flet dot as Edi Rama e as Erjon Braçe, askush tjetër nuk i përmend dot. U dridhet zëri. Sepse janë partnerët e tyre dhe me ta erdhën në pushtet. Ndajnë paratë. Le ta matin veten e tyre pa përkrahjen e krimit dhe ta shohim se sa u vlen lëkura”.
Sipas tij, me keta njerez nuk ka zgjidhje. “Nuk kanë ofertë. Nuk sjellin dot as rend e siguri, as lufte kundër korrupsionit, përkundrazi, të vetmin preokupim është te kapin drejtësinë”- u shpreh Basha gjatë takimit me fermerët.
