Një mesazh kërcënues drejtuar kryeministrit Edi Rama ngriti në këmbë Policinë e Shtetit rreth 5 ditë më parë.
“Do të të fus plumbin ballit”, shkruhej në tekst.
Autori u identifikua si Andrea Kurti, një 32-vjeçar nga Puka, me banim në zonën e Unazës së Re në Tiranë.
Më pas, antiterrori u vu në lëvizje dhe ra në gjurmët e të riut orët e para të mëngjesit të djeshëm dhe e shoqëroi menjëherë për në polici. Ende nuk ka asnjë njoftim zyrtar nga policia për ngjarjen.
Si fillim u mendua se ky kërcënim lidhej me prishjen e banesave në atë zonë.
Edhe pse situata u duk shumë serioze, mësohet se Andrea Kurti është lënë i lirë nga policia, pas verifikimeve të bëra.
Nga kontrolli që u bë në celularin e tij u rikthyen disa mesazhe të fshirë, një prej të cilëve ishte dhe ai në numrin e telefonit të Ramës, që në dukje të jepte përshtypjen e një kërcënimi serioz për jetën.
Nga ana tjetër, Andrea Kurti ka thënë se e gjitha nisi si një shaka mes shokës që sipas tij, e nxitën për të shkruar atë mesazh në drejtim të kryeministrit.
Ende nuk dihet nëse kjo dëshmi është e vërtetë, por tashmë i riu është lënë i lirë.
