Skuadra e Lushnjës është pjesë e kategorisë së parë të futbollit në Shqipëri ku aktualisht kryeson në grupin e jugut me 15 pikë. Megjithatë puna për këtë skuadër nuk është aspak e lehtë sidomos në periudhën e dimrit. Shirat e vazhdueshëm rëndojnë gjendjen e terrenit ku futbollistët stërviten duke i penguar në përgatitjen e tyre.
Fusha e stërvitjes gjendet vetëm 200 metra larg stadiumit ‘’Roza Haxhiu’’ dhe jo vetëm nuk është në dispozicion të skuadrës, por ka mbetur në harresë duke u shndërruar në dimër në një “liqen” që nuk i shërben askujt.
“Unë qëkur mora ekipin i dija kushtet, në fakt me këto kushte jemi përgatitur edhe përpara 20 vitesh. Nga ana profesionale do thoja me të madhe që një terren më i mirë do ishte shumë herë më mirë. A ndikon terreni? Mendoj qe po, por nuk ka vend për justifikim”, është shprehur Ilir Gjyla, Trajner i KS Lushnja
Sa i përket terreneve të cilave u referohet trajneri Gjyla pra atyre që janë në dispozicion të skuadrës, fusha ngjitur stadiumit “Roza Haxhiu” dhe pjesa pas portave brenda stadiumit, nuk është se kanë ndonjë ndryshim nga njëra tjetra.
