Gazetarja e kronikës së zezë Klodiana Lala është shprehur se shteti ka rënë në momentin që një kriminel dhe një prokuror rrinë bashkë.
E ftuar në programin “Real Story” Lala ka komentuar atentatin e së premtes ndaj prokurorit Arian Ndoja, ku mbeti i plagosur vetë ai së bashku me shoferin Andi Maloku dhe ‘të fortin e Shijakut’ Landi Muharremi, ku ka deklaruar se ky i fundit, i cili njihet ndryshe dhe si “Rumi” ka lidhje me zyrtarë të lartë që nga policia e deri të prokuroria.
“Krimi ndryshon ngjyrë. Për ‘Rrumin’, që sot nuk flet, pasi ka marrë plumb në nofull, unë kam informacione se ai rrinte me zyrtar të lartë të policisë, zyrtarë të përgjimeve, ka pastruar dosjet. Ai bënte 3 rrugë në Holandë dhe 1 në Itali. Kishte marrë në mënyrë të paligjshme toka në bregdet, ka 30 përqind të tokave në bregdet. Ai ishte i hetuar për vrasje dhe kishte një sërë çështjes së hapura dhe të mbyllura. Politika e ka amnistuar për të marrë vota. Të gjitha qeveritë e kanë bërë këtë. Ka rënë shteti! Që në një moment që ka lidhje me policin, një prokuror e një kriminel, ka rënë shtetit. Ka pasur vëllain nënkryetar të komunës së Sukthit. Sot e ka vëllain drejtor poste, ka pasur babanë tek komisioni i ndarjes së pronave. Ka rrahur dhe ka bërë maskaradë me pronat”, tha Lala.
Në debat ndërhyri dhe gazetari Basir Çollaku. “Mua më bën përshtypje se kur kërcet kallashnikovi marrim vesh se ‘Rrumi’, ‘Luli’ dhe të tjerë..qenkan të hatashëm. Vetëm atë ditë që kërcet plumbi. Nga drejtësia dhe politika marrin vesh se janë të rrezikshëm. Po çfarë bëjnë këta njerëz jashtë? Pse u bënë të këqij sot dhe janë të mirë ditën e votimeve? Ça i bën bashkë dhe i ndan këta njerëz? I ndan vota, biznesi i përbashkët? A është hetuar nga prokurorë? Me kë e kanë këta persona pasurinë? Nga i kanë marrë paratë?”, tha Çollaku.
