Këshilli i Lartë Gjyqësor (KLGJ) ka rrëzuar ditën e sotme kërkesën për rikthim në detyrë të Guximtar Boçit, gjyqtarit i cili akuzohet për favore seksuale në këmbim të një vendimi.
Dy vjet pas shkarkimit të tij nga detyra, ish-kryegjyqtari i Gjirokastrës kërkoi kthimin në detyrën e mëparshme pasi u shpall i pafajshëm nga Gjykata e Apelit Vlorë në shtator të 2018.
Fillimisht Këshilli i Lartë i Drejtësisë vendosi unanimisht për shkarkimin e kryegjyqtarit në tetor të vitit 2016, pasi emisioni investigativ ‘Stop’ publikoi një natë një videoskandal, ku Boçi kërkonte favore seksuale në këmbim të drejtësisë.
Qytetarja Rudina I. denoncoi publikisht ish-kryegjyqtarin me anë të një audiopërgjimi nga bisedat, kur ajo i kishte kërkuar ndihmë për një gjyq për çështje pronësie me ish-burrin dhe ish-vjehrrën, por Boçi i kishte kërkuar marrëdhënie intime.
Qytetarja pretendonte se Boçi e kishte puthur në zyrë dhe i kishte kërkuar disa herë që të kryenin marrëdhënie seksuale, në mënyrë që qytetarja të fitonte çështjen gjyqësore.
Pasi gruaja humbi gjyqin, denoncoi Boçin, ndërkohë që ky i fundit u akuzua për disa vepra penale, mes të cilave edhe korrupsion pasiv.
Por me marrjen e pafajësisë, ish-kryegjyqtari i ka drejtuar KLGJ-së një kërkesë ku kërkon rikthimin në detyrë, ndërkohë që thekson se ekspertiza e Policisë Shkencore e nxori audio-përgjimin si të sajuar me programe kompjuterike edhe pse denoncuesja pretendon se në 50 minuta përgjime janë publikuar vetëm 4 minuta.
