Nait Hasani, ish-deputeti i Partisë Demokratike të Kosovës (PDK), ka nisur që nga dita e djeshme detyrën e tij si ambasadori i ri i Kosovës në Tiranë.
Hasani u propozua në këtë post pas dorëheqjes së Ramush Haradinajt nga posti i kryeministrit, në kohën kur vendi po shkonte drejt zgjedhjeve të parakohshme.
Propozimi për Hasanin u bë më 19 gusht të këtij viti, ndërsa intervistimi dy ditë më pas.
“Me konsideratën më të lartë për punën tuaj dhe komisionit për Punë të Jashtme, Diasporë dhe Investime Strategjike, pas pajtimit me Kryeministrin e Republikës së Kosovës dhe marrjes së pëlqimit nga Qeveria e Republikës së Kosovës, ju dërgoj në besim emrin e kandidatit Z. Nait Hasani, me qëllim të vijimit të procedurave për emërimin e tij në pozitën e Shefit të Misionit/Ambasadorit në Republikën e Shqipërisë”, thuhej në letrën e propozuar për Hasanin ambasador.
Vetë ambasadori Hasani përmes një shkrimi në llogarinë e tij në rrjetin social Facebook, ka njoftuar se dita e djeshme ka qenë dita e parë e tij si ambasador në Tiranë.
“Dita e parë, sot në Tiranë si Ambasador i Kosovës në Shqipëri, pranë shtatores së Adem Jasharit”, ka shkruar ai.
