LIGJET E BIZNESIT
Projektligji për Paketën Fiskale 2027 parashikon vendosjen e një takse fikse vjetore për automjetet elektrike, në ndryshim nga skema aktuale e mjeteve me karburant. Për autoveturat dhe kategoritë e tjera të përcaktuara në projekt, detyrimi do të jetë 15 mijë lekë në vit, ndërsa për motomjetet elektrike 1 mijë lekë. Automjetet elektrike pritet të përfshihen në një skemë të re taksimi vjetor. Projektligji për ndryshimet në ligjin “Për taksat kombëtare”, pjesë e Paketës Fiskale 2027, parashikon një taksë fikse prej 15 mijë lekësh në vit për automjetet elektrike dhe 1 mijë lekë në vit për motomjetet elektrike.
Sipas relacionit të Ministrisë së Financave, taksa prej 15 mijë lekësh do të zbatohet për autoveturat elektrike, mjetet e kategorive të përcaktuara në projektligj dhe autobusët elektrikë. Për motomjetet elektrike parashikohet një detyrim vjetor prej 1 mijë lekësh. Ndryshe nga automjetet që përdorin naftë, benzinë apo gaz, për të cilat taksa vjetore llogaritet duke marrë në konsideratë cilindratën, llojin e karburantit dhe vjetërsinë e mjetit, për automjetet elektrike propozohet një shumë fikse, në varësi të kategorisë.
Qeveria synon të zgjerojë bazën e taksimit
Sipas argumentimit të Ministrisë së Financave, vendosja e kësaj takse synon përfshirjen e automjeteve elektrike në skemën e taksimit vjetor dhe zgjerimin e bazës së taksapaguesve. Nga kjo masë, të ardhurat shtesë për buxhetin e shtetit vlerësohen në rreth 240 milionë lekë në vit. Taksa për automjetet elektrike është pjesë e një pakete më të gjerë ndryshimesh në taksimin e mjeteve të transportit. Projektligji parashikon gjithashtu heqjen e taksës së qarkullimit për benzinën dhe naftën, rritjen e taksës vjetore për automjetet luksoze nga 21 mijë në 40 mijë lekë dhe ndryshimin e formulës së llogaritjes së taksës vjetore për mjetet e përdorura. Sipas projektligjit, ndryshimet parashikohet të kenë efekte nga 1 janari 2027, pas përfundimit të procedurave të miratimit dhe hyrjes në fuqi të ligjit.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
