LIGJET E BIZNESIT
Banka e Shqipërisë ka mbajtur të pandryshuar në 2.5% normën bazë të interesit, por ka paralajmëruar një rritje të mundshme të cmimeve, për shkak të situatës gjeopolitike. Guvernatori i BSH-së, Gent Sejko ka deklaruar pas mbledhjes së Këshillit Mbikëqyrës se situata në vendet e tjera partnere do të ndikojë në ekonominë shqiptare, e cila vijon të jetë në rritje të qëndrueshme.
“Informacioni i ri i përftuar gjatë dy muajve të fundit sugjeron se presionet mbi inflacionin kanë ardhur në rritje, në përgjigje të rritjes së çmimeve në tregjet botërore dhe të inflacionit në partnerët tanë tregtarë. Nga ana tjetër, ekonomia shqiptare vijon të qëndrojë në një trend solid rritjeje, ndërsa tregjet financiare janë të qeta dhe kredia për ekonominë ka shënuar rritje të shpejtë. Politika e kujdesshme monetare e Bankës së Shqipërisë ka dhënë një kontribut pozitiv në këtë ecuri, duke mundësuar si krijimin e një ambienti financiar akomodues për rritjen ekonomike, ashtu edhe kontrollin e pritjeve për inflacionin në të ardhmen”, u shporeh Sejko.
Guverantori ka shpjeguar se përditësimi i parashikimeve tregon se inflacioni ka gjasa të rritet më tej gjatë dy tremujorëve në vijim. “Megjithatë, kjo rritje pritet të jetë e moderuar dhe e përkohshme. Më pas, duke filluar nga mesi i vitit të ardhshëm, inflacioni pritet të vijë në rënie graduale drejt objektivit. Nga ana tjetër, vëllimi i aktivitetit ekonomik në vend pritet të rritet me ritme të qëndrueshme dhe pranë potencialit, duke pasqyruar bazat solide të rritjes dhe ambientin stimulues financiar”, ka deklaruar Sejko.
Bazuar në këto konsiderata, Këshilli Mbikëqyrës vendosi të mbajë të pandryshuar qëndrimin e politikës monetare në mbledhjen e fundit. “Megjithatë, këto parashikime, si dhe prania e rreziqeve të kahut të sipërm mbi inflacionin, forcojnë premisat për një lëvizje në kahun normalizues të qëndrimit të politikës monetare në të ardhmen”, u shpreh kreu i BSH-së.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
