“Giro d’Italia 2025” bllokon trafikun. Ja rrugët ku ndalohet qarkullimi dhe parkimi nga 8-11 maj

Zhvillimi i garës së çiklizmit “Giro d’Italia 2025” në Shqipëri do të sjellë bllokimin e qarkullimit të automjeteve dhe ndalimin e parkimit në data 8, 9, 10 dhe 11 në Tiranë, Durrës dhe Vlorë sipas 3 itinerareve përkatës. Në një deklaratë për mediat, drejtori i Policisë Rrugore Altin Qato bëri me dije se Policia e Shtetit ka hartuar një plan të detajuar masash, për manaxhimin dhe sigurimin e qarkullimit rrugor, garantimin e rendit publik, si dhe për mbarvajtjen e aktivitetit sportiv.

Bllokimi i parkimeve dhe rrugëve urbane të Durrës përfshin datat 8 dhe 9 maj, kur përmbyllet etapa e parë. Ndërkohë që, Tirana do të ketë kufizim në datat 9 dhe 10 maj, për shkak të zhvillimit të 2 etapave të para.

“Bllokimi i akseve rrugëve urbane në Tiranë. Ndalimi i qarkullimit dy orë para kalimit të garuesve në gjithë itinerarin e etapës së parë. Tiranë -Tiranë, etapa e II-të, më datë 10.05.2025 është garë kronometrike. Nga ora 08:00 deri në orën 11:00 do të jetë levizje kufizuar dhe nuk do të lejohen parkime në segmentet rrugore: “Zogu i Zi” dhe në itinerarin Rruga e Durresit, Rruga “Fortuzi”, Rruga “Dervish Hatixhe”, Rruga e Barrikadave, rruga pas Pallatit të Kulturës. Ndalimin e qarkullimit të automjeteve, me përjashtim të mjeteve të emergjencës dhe Policisë së Shtetit, nga ora 10:00 deri në orën 18:00 të datës 10.05.2025, në gjithë itinerarin e etapës së dytë”, -tha Qato.

Edhe për etapën e tretë Vlorë – Vlorë parashikohet ndalim parkimesh dhe qarkullimi në disa rrugë të qytetit dhe interurbane. Ndalimi i parkimeve nis nga ora 15:00 e datës 10 maj, deri në orën 18:00 të datës 11 maj. Për të shkuar në portin e Vlorës do të perdoret rruga Transballkanike, e cila do të jetë e aksesueshme gjatë gjithë kohës nga mjetet dhe shtetasit.

Këto masa kanë për qëllim të garantojnë sigurinë rrugore, mbarvajtjen e garës dhe minimizimin e ndikimit në lëvizjen e qytetarëve dhe mjeteve.  Policia Rrugore iu bën thirrje të gjithë qytetarëve që të respektojnë sinjalistikën rrugore dhe udhëzimet e punonjësve të Policisë, të shmangin lëvizjet me mjete në zonat e prekura gjatë kohës së zhvillimit të garës dhe të ndjekin informacionin zyrtar. Gjithashtu, falënderon publikun për mirëkuptimin dhe bashkëpunimin, gjatë kësaj ngjarjeje të rëndësishme sportive.

E rëndësishme është që qytetarët të njohin itinerarin e etapave, për të kuptuar rrugët ku do të ketë bllokime.