Tender 355 milionë lekë për gjobat

Agjencia Kombëtare e Shoqërisë së Informacionit ka hapur një tender për ngritjen e regjistrit për ekzekutimin dhe vjeljen e gjobave për institucionet shtetërore, me fond limit 355 milionë e 531 mijë lekë.

Përgjate viteve të fundit, kur edhe digjitalizimi i proceseve në Shqipëri ka marrë një zhvillim të vrullshëm, është reflektuar dobishmëria dhe performanca e lartë që ka sjellë, duke e bërë në këtë mënyrë më eficiente veprimtarinë e punës, por njëkohësisht edhe me kosto kohore dhe financiare më të ulët.

Aktualisht, procesi i mbledhjes së gjobave në Shqiperi është i fragmentuar, ku çdo institucion përdor sisteme të ndryshme në format, përmbajtje, teknologji dhe koncept. Kjo ka shkaktuar mospërputhje, vonesa dhe rritje të kostove administrative. Qytetarët përballen me konfuzion dhe vështirësi për të kryer pagesat e gjobave, ndërsa qeveria has sfida në gjurmimin dhe menaxhimin efektiv të të ardhurave nga gjobat.

Sipas dokumentit të publikuar në Agjencinë e Prokurimit publik thuhet, se ekziston nje nevojë për një sistem të automatizuar për të rritur efikasitetin dhe transparencen. Prandaj, nëpërmjet këtij projekti synohet automatizimi i proceseve, duke implementuar një sistem të automatizuar që përpunon gjobat në mënyre më të shpejtë dhe efikase. Njëkohësisht, do të rritet transparenca dhe përmirësimi i aksesit të përdoruesve, duke zhvilluar një platformë online që ofron qasje të lehtë për informacionin e gjobave dhe mundëson pagesat e thjeshta për përdoruesit.

Përdorimi i teknologjisë të përditësuar për të automatizuar proceset do të zvogëlojë punën manuale dhe do të rrisë besueshmërinë e përgjithshme të sistemit, duke siguruar pagesa në kohe dhe të sakta dhe duke maksimizuar te ardhurat në buxhet.

Sipas dokumentit, ky investim do të reduktojë barrën administrative dhe do të minimizojë potencialin per evazion.