Këpucët e larta janë simbol i feminitetit dhe elegancës, por ndonjëherë kthehen në një “torturë” të vërtetë. Takat e larta janë sa vuajtje aq edhe kënaqësi për të gjitha gratë. Veshja e tyre shpesh vjen me dhimbje dhe ka një arsye shumë të thjeshtë. Pozicioni i panatyrshëm që merr këmba do të thotë që pjesa më e madhe e peshës së trupit nuk shkon në thembër, por në pjesën e majës së kambës. Përpara se të dëshpëroheni dhe të hiqni dorë, të filloni të ecni zbathur në rrugë, mund të provoni të ndiqni disa këshilla të dobishme për të reduktuar dhimbjen e këmbëve.
Gjithçka fillon me zgjedhjen e duhur bazuar në formën e këmbës. Nëse keni një këmbë të madhe, veshja e takave të ngushta në gishta mund të bëhet një makth, pasi ato ngjeshin tepër gishtat duke e bërë të pamundur të qëndroni me to veshur. Më mirë të zgjidhni modele me një taban pak më të gjerë dhe majë të rrumbullakosur. Alternativa mund të jetë zgjedhja e këpucëve më të mbuluara në pjesën e përparme dhe me rrip, në mënyrë që këmba të lodhet më pak gjatë ecjes.
Në çdo rast, përpara se t’i vishni, sigurohuni që t’i keni hidratuar mirë këmbët: një veprim në dukje i parëndësishëm, por shumë i dobishëm për uljen e fërkimit dhe shmangien e krijimit të flluskave. Dhe nëse këto të fundit do të formoheshin gjithsesi, atëherë është më mirë të keni me vete ato që quhen jastëk silikoni ose lateksi: ka lloje të ndryshme dhe për pika të ndryshme të këmbës, nga thembra deri te shputa, që i gjeni në farmaci.
Një sekret tjetër i vogël quhet shirit ngjitës: thjesht aplikojeni në gishtin e tretë dhe të katërt për t’i mbajtur të lidhur dhe për të parandaluar që pesha të vendoset e gjitha mbi to. Dhimbja do të shfaqet herët a vonë, por ju mund ta vononi. Një tjetër aspekt themelor është ecja: gabimi më i zakonshëm është vendosja e të gjithë shputës së këmbës në të njëjtën kohë. Në vend të kësaj, idealja është të zhvendosni peshën më shumë në thembër: do të përmirësojë ekuilibrin dhe shpërndarjen e presionit.
Pasi të shkoni në shtëpi, jepini pak pushim ekstremiteteve të gjymtyrëve tuaja të poshtme. Masazhimi i tyre me një krem të veçantë dhe mbajtja pakove të akullit janë ilaçe të shkëlqyera për shqetësimet dhe ënjtjet. Për ta mbyllur, në rast se të gjitha këto masa paraprake nuk mjaftojnë, do të detyroheni të përballeni me realitetin e ashpër. Ka vërtet shumë modele të ndryshme këpucësh të larta. Nëse ato me taka stiletto bëhen të padurueshme, gjithmonë mund t’i drejtoheni këpucëve me taka bllok ose platforma. Megjithatë, ato janë super në modë dhe do t’ju lejojnë të kaloni ditën me shumë më pak telashe.
Revista Living
