Aksidentohet autobusi në Bullgari, brenda udhëtonin 29 shqiptarë të Kosovës (FOTO)

Një aksident automobilistik ka ndodhur mëngjesin e sotëm në qytetin Kyuestendil në Bullgari.

Mësohet se brenda në autobus udhëtonin 29 shqiptarë nga Kosova, gjashtë prej të cilëve fëmijë.

Sipas medias vendase Struma, aksidenti u shënua rreth orës 04:30, kur mjeti është përplasur me një kamion të ndaluar që transportonte dru.

Drejtuesi i kamionit raportohet se po përpiqej t’u tregonte të tjerëve në trafik se një pemë kishte rënë në rrugë. Autobusi e goditi kamionin dhe ai doli nga rruga.

Shoferi i autobusit ka pësuar lëndime të lehta dhe është dërguar në Qendrën Mjekësore Qendrore në Kyustendil për ekzaminime dhe ndihmë.

Vendi i ngjarjes është ekzaminuar nga Policia, ndërkohë që për aksidentin ka nisur procedimi paraprak dhe është njoftuar prokurori kujdestar.