Lajm i trishtë. Ndahet nga jeta një nga figurat më të shquara atdhetare, që “e qëndisi” dhe e nderoi trimërisht flamurin shqiptar me shqiponjën e zezë dykrenare në diasporë. Ahmet Zherka ka mbetur thellë në mendjet dhe zemrat e të gjithë shqiptarëve patriotë.
Momenti kur atdhetari i madh Ahmet Zherka e ‘qëndisi’ me shtatë plumba në ballë shkelësin e flamurit kombëtar, në ato ditë gushti të 1975 mu në zemrën e Nju Jorkut, ne Manhatanin magjik, nuk do të harrohen kurrë.
Ahmet Zherka ka lindur në Alpet shqiptare, aty ai u shoqërizua me shkreptimat gjëmëmëdha dhe rrufetë tronditëse.
Në shtëpinë e te parëve të vet, dëgjoi këngë të trimërisë dhe bujarisë. Atij i kishte bërë përshtypje dhe e kendonte shpesh këngën për “trimin e trimave” Gjergj Elez Alinë; i ishin skalitur në mendje veçanërisht vargjet:
Pak pa mrrijtë, baloz, ti m’ke dredhue:
M’ke lypë motrën para se mejdanin;
M’ke lypë berret para se çobanin,
E jam dredhë n’ket log për me t’kallxue,
Se ne të parët nji kanu na kanë lanë:
Armët me dhanë përpara e mandej gjanë!
