LIGJET E BIZNESIT
Kryeministri Edi Rama e ka cilësuar Raportin Vjetor të Progresit të Komisionit Europian si një vlerësim historik për Shqipërinë, duke theksuar se vendi vlerësohet më lart se në çdo raport të mëparshëm. Në një reagim, Rama e përshkruan raportin si një “dëftesë notash domethënëse dhe inkurajuese” dhe një tjetër hap drejt objektivit të anëtarësimit në Bashkimin Europian. Kreu i qeverisë pranon se Shqipëria ka ende shumë detyra përpara, ndërsa afatet e negociatave po ngushtohen.
“Ky vlerësim nuk i bën as më të vogla, as më pak aktuale problematikat e jetës së përditshme të vendit”, shkruan Rama, duke shtuar se raporti duhet të shërbejë si motivim për të bërë më shumë dhe më mirë. Kryeministri e cilëson momentin si optimal për integrimin europian, duke vlerësuar se dera e Bashkimit Europian është e hapur dhe mundësia e anëtarësimit është më reale se kurrë. Në mesazhin e tij, Rama u bën thirrje shqiptarëve të lënë pas ndasitë dhe përplasjet, duke theksuar se ato kanë penguar vendin të shfrytëzojë potencialin e tij.
Reagimi i Kreyministrit Edi Rama:
Doli Raporti Vjetor i Progresit. Shqipëria vlerësohet më lart se sa asnjëherë më parë. Një tjetër moment krenarie për Shqipërinë Europiane. Një tjetër dëftesë notash domethënëse dhe inkurajuese nga Komisioni Europian. Një tjetër hap përpara drejt objektivit historik të bashkimit me Europën. Por detyrat përpara nesh janë ende të shumta, kurse koha e kalendarit të ngjeshur të negociatave gjithnjë e më e ngushtë. Dhe ky vlerësim nuk i bën as më të vogla, as më pak aktuale problematikat e jetës së përditshme të vendit, të cilat kanë pasur, kanë dhe do të kenë të gjithë vëmendjen time, të qeverisë, të shumicës parlamentare. Përkundrazi, vlerësimi i lartë i raportit të sotëm na motivon për të bërë ende më shumë dhe për t’i bërë gjërat ende më mirë. Momenti është optimal. Dera e BE është e hapur dhe mundësia e hyrjes është më reale se kurrë. Historia nuk do të na e falte kurrësesi mbytjen në lugën e ujit të pistë të dasive, mllefeve e gjelozive që e kanë penguar vazhdimisht Shqipërinë të ngrihet në lartësinë e potencialit të saj. Kokën lart dhe përpara Shqipëri🇦🇱🦅🇪🇺
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
