Monopatinat elektrike që plotësojnë kritere të caktuara për peshën dhe shpejtësinë do të përfshihen në skemën e sigurimit të detyrueshëm të mjeteve motorike. Pronarët e tyre do të duhet të pajisen me policë sigurimi përpara se t’i nxjerrin në qarkullim, ndërsa në rast aksidentesh do të garantohet mbulimi i dëmeve ndaj palëve të treta.
Parashikimi është pjesë e projektligjit të ri “Për sigurimin e detyrueshëm në sektorin e transportit”, i cili zgjeron përkufizimin e mjeteve motorike duke përfshirë edhe disa kategori të mjeteve të vogla elektrike. Sipas kritereve të përcaktuara në projektligj, si mjet motorik do të konsiderohet çdo mjet që lëviz me fuqi mekanike dhe ka shpejtësi maksimale të projektuar mbi 25 kilometra në orë. Në këtë kategori përfshihen edhe mjetet me peshë neto mbi 25 kilogramë, nëse shpejtësia maksimale e projektuar është mbi 14 kilometra në orë.
Konkretisht, një monopatinë me shpejtësi maksimale 30 km/orë do t’i nënshtrohet sigurimit të detyrueshëm, pavarësisht peshës. E njëjta gjë vlen edhe për një monopatinë 30 kilogramë që arrin shpejtësinë 20 km/orë. Ndërsa një model me peshë 20 kilogramë dhe shpejtësi maksimale 25 km/orë mbetet jashtë këtij detyrimi. Projektligji përcakton se pronarët e mjeteve që përmbushin këto kritere duhet të lidhin kontratë sigurimi të përgjegjësisë ndaj palëve të treta përpara përdorimit dhe ta rinovojnë atë për sa kohë mjeti qëndron në qarkullim. Gjatë lëvizjes, drejtuesit duhet të mbajnë me vete policën ose një dokument që vërteton sigurimin.
Mbulimi do të përfshijë dëmet shëndetësore dhe materiale që mund t’u shkaktohen personave të tjerë. Kështu, në rast se përdoruesi i një monopatine shkakton aksident duke dëmtuar një këmbësor, çiklist apo një automjet tjetër, përgjegjësia për dëmshpërblimin do të mbulohet nga kompania e sigurimit, sipas kufijve dhe kushteve ligjore.
Megjithatë, sigurimi i detyrueshëm nuk përbën sigurim personal për drejtuesin e monopatinës dhe nuk garanton mbulimin e dëmtimeve të tij kur është përgjegjës për aksidentin. Projektligji nuk parashikon ende një tarifë specifike për sigurimin e monopatinave elektrike. Kostoja do të përcaktohet në kuadër të rregullave përkatëse të zbatimit. Ndryshimet synojnë të përshtatin legjislacionin e sigurimeve me përdorimin gjithnjë e më të madh të mjeteve elektrike në transportin urban dhe të garantojnë një mekanizëm dëmshpërblimi për personat e dëmtuar në aksidente. Megjithatë, detyrimi do të hyjë në fuqi vetëm pas miratimit të projektligjit dhe hyrjes së tij në fuqi.







