LIGJET E BIZNESIT
Rezerva e sigurisë së hidrokarbureve do të administrohet në të ardhmen nga një subjekt shtetëror dhe jo më nga operatorët privatë. Ndryshimi parashikohet në projektligjin e miratuar sot nga Këshilli i Ministrave, i cili synon një riorganizim të mënyrës së ruajtjes dhe menaxhimit të rezervave.
Ministri i Energjisë dhe Infrastrukturës, Enea Karakaçi, tha pas mbledhjes së qeverisë se ndryshimi sjell një qasje të re në administrimin e rezervës.
“Mbajtja e rezervës së sigurisë së hidrokarbureve bëhet nga një subjekt shtetëror, duke i dhënë një garanci dhe siguri mbajtjes dhe përdorimit”, deklaroi Karakaçi.
Projektligji parashikon krijimin e Autoritetit Kombëtar për Sigurinë e Hidrokarbureve, i cili do të jetë përgjegjës për ruajtjen dhe menaxhimin e rezervës, si dhe për hedhjen e saj në treg në rast nevoje dhe sipas përcaktimeve ligjore.
Sipas ministrit, rezerva shërben si mekanizëm sigurie në rastet kur tregu përballet me mungesë të hidrokarbureve.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Nisma synon gjithashtu përafrimin e legjislacionit shqiptar me direktivat e Bashkimit Evropian për sigurinë e furnizimit me hidrokarbure.
