Përfundon sot afati për programin e vetëpunësimit, jepen grante deri në 1 milion lekë për ide të reja biznesi

Agjencia Kombëtare e Punësimit dhe Aftësive bën me dije, se deri më 30 shtator është afati i fundit për të gjithë punëkërkuesit e papunë me një ide të qartë biznesi, për të aplikuar për mbështetje përmes programit të vetëpunësimit, për të kthyer idenë e tyre në realitet.

Programi subvencionon të gjithë të përzgjedhurit sipas një procesi të drejtë dhe konkurrues grantin, për ngritjen e biznesit deri në masën 1 milion lekë. Ndërkohë, individët do të trajnohen dhe mbështeten nga ekspertë të kualifikuar, si dhe do të kenë mbështetje në zhvillimin e një plani të konsoliduar të biznesit.

Në një kohë kur shumë të rinj dhe të reja kanë ide novatore, ky program ofron një trampolinë për t’i çuar ato përpara dhe për t’i kthyer në biznese të qëndrueshme. Ky program ka si qëllim nxitjen e frymës së sipërmarrjes dhe zhvillimit ekonomik në vend, duke ofruar jo vetëm mbështetje financiare, por edhe profesionale.

Për të aplikuar në këtë program, aplikuesi duhet të plotësojë disa kritere: Të jetë punëkërkues i papunë i regjistruar në strukturën vendore të punësimit;  të ketë një ide biznesi. Gjithashtu, aplikimi bëhet në platformën e-Albania, përmes shërbimit “Kërkesë për pjesëmarrje në programin e vetëpunësimit”. Aplikuesit duhet të plotësojnë formularin përkatës dhe të dorëzojnë dokumentacionin e nevojshëm.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern