LIGJET E BIZNESIT
Sistemi bankar në Shqipëri vijon të regjistrojë fitime të konsiderueshme, me rreth 24 miliardë lekë fitim neto në periudhën janar-shtator 2026. Të ardhurat e bankave mbështeten kryesisht te interesat nga kreditë, komisionet dhe shërbimet financiare.
Sipas të dhënave të Bankës së Shqipërisë, vetëm gjatë tremujorit të tretë, në periudhën korrik-shtator, të ardhurat bruto të sistemit bankar arritën në rreth 30.5 miliardë lekë. Interesat vijojnë të jenë burimi kryesor i të ardhurave për bankat, përmes pagesave që qytetarët dhe bizneset kryejnë për kreditë e marra. Paralelisht, institucionet financiare sigurojnë të ardhura edhe nga komisionet, gjobat dhe shërbimet e tjera bankare.
Por aktiviteti bankar shoqërohet edhe me kosto të konsiderueshme. Gjatë tremujorit të tretë, shpenzimet për personelin dhe kostot e tjera operative arritën në afro 17.8 miliardë lekë. Në këtë kategori përfshihen pagat, mirëmbajtja e degëve, teknologjia dhe shërbimet e nevojshme për funksionimin e bankave.
Ndërkohë, rreth 6.1 miliardë lekë të tjera u shpenzuan për interesa, kryesisht për depozitat e qytetarëve dhe burimet e tjera të financimit. Pas zbritjes së shpenzimeve, provigjoneve dhe detyrimeve tatimore, fitimi neto i sistemit bankar për periudhën korrik-shtator rezultoi rreth 9.6 miliardë lekë.
Në total, për nëntë muajt e parë të vitit 2026, fitimi neto i raportuar arrin në afro 24 miliardë lekë. Të dhënat tregojnë se sistemi bankar vijon të ruajë një nivel të lartë përfitueshmërie, ku interesat nga kreditimi dhe të ardhurat nga shërbimet financiare mbeten burimet kryesore të aktivitetit të tij.
