Dalja nga shtëpia me leje/ Rama prezanton aplikacionin: Përgjigjen e merrni për 24 orë

Kryeministri Edi Rama ka prezantuar aplikacionin, që do të funksionojë për të gjithë qytetarët që duhet të dalin nga banesa për të bërë pazaret.

Procedura do të bëhet në faqen zyrtare të Policisë së Shtetit.

“Me një SMS merr leje për të dalë nga shtëpia. Leja do dërgohet me mesazh dhe përgjigjen nuk do e merrni direkt, por pas 24 orësh. Kush del pa leje dhe jashtë orarit, do ti merret makina dhe do të gjobitet, që të jemi të qartë. Vetëm një anëtar familje do të dalë për të bërë pazar. Sistemi nuk lejon dy anëtarë familje për të bërë pazar. Gjithkush duhet të ketë në telefon atë leje që ka marrë në mënyrë që policia ta konsiderojë një qytetar në zbatim të ligjit.”, ka shpjeguar kryeministri.

Rama tha se pensionistët nuk mund të aplikojnë në këtë sistem. Sipas tij përgjigjja do të jetë negative për çdo të moshuar.

“Do të kujdesemi ne me ekipet tona në territori që t’iu bëjme pazaret, t’iu çojmë ilaçet. Nuk do të dalin më pensionistët në rrugë. Ata që do të dalin do të jenë të penalizuar. I kam kërkuar kryetarit të bashkisë së Tiranës për të ndarë tezgat në Tiranë. Nga dita e nesërme ky do të fillojë të ndryshojë në tregjet e lagjeve”, u shpreh ai.