LIGJET E BIZNESIT
Mbi 42 mijë qytetarë janë rimbursuar plotësisht për tepricën kreditore të përfituar nga Deklarata Individuale Vjetore e të Ardhurave, DIVA 2025. Sipas të dhënave të administratës tatimore, deri më 30 shtator 2026, në llogaritë bankare të 42.132 tatimpaguesve janë transferuar rreth 6.84 milionë euro, në formën e tatimit të mbipaguar. Në total, për DIVA 2025 janë dorëzuar 164.263 deklarata, ose 25% më shumë krahasuar me vitin 2025. Ndërkohë, 77.077 qytetarë rezultojnë përfitues nga skema e zbritjes tatimore për fëmijët nën 18 vjeç.
Sipas Ministrisë së Financave, shuma totale e gjeneruar nga sistemi për rimbursim për individët me tepricë kreditore arrin në 1.4 miliardë lekë, ose rreth 15 milionë euro. Po kush përfiton nga rimbursimi i DIVA 2025? Individët e punësuar me të ardhura vjetore prej 1.2 milionë lekësh ose më shumë kanë të drejtë të përfitojnë zbritje tatimore për fëmijët në ngarkim, me kusht që të kenë dorëzuar DIVA 2025 dhe të kenë aplikuar për rimbursim përmes sistemit e-Filing.
Ndërsa individët me të ardhura vjetore nën 1.2 milionë lekë, të cilët nuk e kanë detyrim ligjor plotësimin e deklaratës, por e kanë dorëzuar atë vullnetarisht, mund të përfitojnë zbritje tatimore si për fëmijët në ngarkim, ashtu edhe për shpenzimet arsimore.
Për njohjen e shpenzimeve arsimore, dokumenti ligjor i kërkuar është fatura e fiskalizuar. Si dokumente mbështetëse mund të shërbejnë edhe kontratat me institucionet përkatëse. Administrata tatimore sqaron se nuk ka një afat të përcaktuar për paraqitjen e kërkesës për rimbursim. Teprica kreditore nuk humbet dhe mund të tërhiqet edhe pas dy ose më shumë vitesh, përfshirë rastet kur shumat e mbartura kërkohen së bashku.
Mekanizmi i zbritjeve tatimore përmes DIVA 2025 synon t’u krijojë individëve mundësi për të përfituar nga deklarimi i saktë i të ardhurave dhe nga shpenzimet e njohura nga legjislacioni tatimor, duke lehtësuar barrën fiskale për familjet dhe duke nxitur formalizimin e deklarimeve.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
