Dëmtimet në banka, BSH: Kursimet e qytetarëve nuk rrezikohen

Banka e Shqipërisë u garanton qytetarëve se dëmtimet fizike në disa degë bankare dhe bankomate nuk cenojnë sigurinë e depozitave dhe kursimeve të tyre, as qëndrueshmërinë financiare të bankave. Në një deklaratë për mediat, pas incidenteve të ditëve të fundit gjatë protestave, banka qendrore thekson se sistemi bankar vijon të funksionojë dhe se depozitat e klientëve mbeten të sigurta. Sipas Bankës së Shqipërisë, incidentet ndaj disa degëve bankare dhe bankomateve kanë shkaktuar dëme materiale dhe kufizime të përkohshme të shërbimeve në disa ambiente. Megjithatë, këto dëmtime nuk përbëjnë rrezik për kursimet e qytetarëve dhe as për stabilitetin financiar të institucioneve bankare. Banka qendrore bën me dije se shërbimi i pagesave ka vijuar të funksionojë normalisht dhe pa ndërprerje, duke garantuar përmbushjen e nevojave të bizneseve dhe familjeve për pagesa e transaksione financiare.

Kufizimet e përkohshme në disa degë lidhen me nevojën për të garantuar sigurinë fizike të klientëve dhe punonjësve. Për këtë arsye, qytetarët dhe bizneset ftohen të ndjekin njoftimet zyrtare të bankave përkatëse dhe të përdorin kanalet alternative të shërbimit bankar. Në deklaratën e saj, Banka e Shqipërisë nënvizon rëndësinë e sistemit bankar për funksionimin e ekonomisë dhe jetën e përditshme të qytetarëve. Përmes tij kryhen pagesat e pagave dhe pensioneve, administrohen kursimet familjare, financohen aktivitetet e biznesit dhe mbështeten investimet që krijojnë vende pune.

Sipas bankës qendrore, funksionimi normal i institucioneve financiare lidhet drejtpërdrejt me vazhdimësinë e aktivitetit ekonomik, mirëqenien e qytetarëve dhe besimin në sistemin financiar. Në këtë kontekst, Banka e Shqipërisë u bën thirrje qytetarëve që, gjatë ushtrimit të së drejtës për protestë paqësore, të respektojnë dhe të mbrojnë institucionet bankare, infrastrukturën, ambientet dhe punonjësit e tyre. Ruajtja e këtyre institucioneve, thekson banka, është thelbësore për garantimin e shërbimeve financiare nga të cilat varen qytetarët dhe bizneset në të gjithë vendin.