LIGJET E BIZNESIT
Ministria e Shëndetësisë në një njoftim zyrtar pas mesnate, konfirmoi dy rastet e para me koronavirusin e ri COVID-19 në vendin tonë.
Bëhej fjalë për një 28-vjeçar që kishte ardhur nga Firence në Shqipëri me makinë në rrugë tokësore dhe pas kontaktit ka infektuar edhe babanë. Gjendja e dy të prekurve, është e stabilizuar dhe nuk paraqesin komplikacione.
Të ftuar këtë pasdite për të folur për situatën aktuale të Koronavirusit në vendin tonë ishin mjeku infeksionist Pëllumb Pipero, ambientalisti Sazan Guri, specialistja e turizmit Flora Xhemani Baba, gazetarja Rashela Shehu dhe pedagogia Iris Luarasi.
Gjatë diskutimit, mjeku infeksionist Pëllumb Pipero nuk ishte dakord me teorinë e ambientalistit Sazan Guri në lidhje me koronavirusin, duke i thënë se të tilla teza po shpërndajnë vëmendjen dhe se nuk kanë bazë shkencore.
Sazan Guri: Unë mendoj që shqiptari është racë parake, është racë pellazge, shumë veta nuk e besojnë këtë, nuk duan ta dinë dhe si racë e parë ka një gjak 0 negativ, ka gjak më të fortë se të tjerët. Ka një antropologji dhe një imunologji të lindur parake dhe duke qenë parake, gjithë të tjerët janë transformuar pas saj dhe shqiptarët janë ushqyer, po ta vësh re gripi i 1918-1928, 10 vjet që zgjati dhe mori jetën e 50 milionë njerëzve, shqiptarët ishin më të paprekshëm në atë kohë, për shkak të një ushqyerje, të ushqimeve që janë me origjinë mesdhetare. Vegjetacioni, përbërja e strukturës njerëzore, antropologjisë, shqiptari është më shumë rezistent.
Pëllumb Pipero: Tani nuk mund ta lejoj më Sazanin të vazhdoj të flasë kështu. Të lutem, të kërkoj ndjesë profesor.
Sazan Guri: S’ka problem, po ç’ke o burrë i dheut.
Pëllumb Pipero: Unë jam profesor i sëmundjeve infektive!
Sazan Guri: Po s’thashë gjë unë!
Pëllumb Pipero: Natyrisht ne që merremi me sëmundje infektive, e dimë shumë mirë sesa imunitet që kanë shqiptarët, sa të imunizuar jemi, sa vulnerabël jemi ndaj sëmundjeve infektive. Unë mendoj që në këtë situatë ku jemi tashmë, përpara një epidemie me shumë të panjohura, përpara një virusi që shumë pak gjëra i dimë. Ne dimë vetëm majën e ajsbergut tani, pjesa më e madhe është ende e pazbuluar. Të tilla hipoteza apo qofshin dhe teori që nuk janë studime, janë teza dhe hipoteza, por jo një bazë të vërtetë shkencore mendoj që na shpërndajnë vëmendjen. Duhet medoemos mos e shpërndajmë vëmendjen në të gjitha gjërat. Do më vinte shumë keq, që të jem në një panel, ku të diskutohen ca gjëra që kam 1 mijë e një argumente për ta hedhur poshtë. Prandaj ta bëjmë më serioz diskutimin të lutem.
Sazan Guri: Ashtu siç kam dhe unë 1 mijë e ca që thotë mjekësia.
Pëllumb Pipero: Nuk besoj se është vendi për debat këtu.
