Ish-deputetja e Partisë Socialiste Arta Dade njihet si një nga zërat më kritikë kundër kryeministrit Edi Rama.
Së fundmi ajo ka deklaruar se mes figurave politike gjithnjë ka patur një “marrëveshje” por të pashkruar, për të amnistuar penalisht njëri-tjetrin.
E ftuar në programin “Arena”, Dade është kthyer pas në kohë, duke folur me emra konkretë, sesi palët kanë mbyllur dosjet e njëra-tjetrës, sa herë ndërrohej pushteti, qëndror dhe lokal.
“Njerëzit që e mbështetën fillimisht kishin të bënin me pak interesa lidhur me pozitën e tij si kryetar bashkie. Nuk dua të kthehem për çfarë është akuzuaar. Duke qenë se kam qenë atje, kam qenë pjesë dhe shumë gjëra dhe nuk i besoja. Fakti që kur vajti Lulzim Basha në bashki i mbylli të gjitha akuzat që bëheshin kundrejt ish-kryetarit të bashkisë, dhe Edi Rama ka qëndruar në bashki 11 vjet. Dhe fakti që kur vajti Rama në zyrën e Berishës i mbylli të gjithë akuzat që ne bënim 8 vjet në parlament përfshirë 21 janarin tregon që këtu ka një çështje morale, ti mos më ngacmo mua dhe unë nuk të ngacmoj ty. Është kultura e pandëshkueshmërisë që ka mbajtur Shqipërinë larg BE, përveç konfliktualitetit politik. Politika ka mbetur në qerthurin e zhbërjes dhe zvetnisë morale, asnjë nga forcat politike nuk jep shpresë dhe llogari për atë çfarë ka premtuar”, deklaroi Dade.
