U miratua pasditen e kësaj të enjteje në Kuvend paketa Anti-KÇK, e njohur ndryshe si akti normativ i qeverisë për goditjen e krimit të organizuar dhe sekuestrimin e pasurive të paligjshme të personave nën hetim ose të dënuar.
Kjo paketë e propozuar nga mazhoranca ka kaluar me 89 vota pro, ndërsa pati 3 abstenime dhe 17 kundër. Kryeministri Rama në fjalën e tij tha se politikanët do të bëhen pjesë e saj me rastin e parë që ai do dalë para prokurorisë apo gjykatës.
Nga foltorja e Kuvendit ai u shpreh se OFl-ja duhej të ishte miratuar më herët por nuk kishte ardhur ende momenti i duhur.
Operacioni Forca e Ligjit duhej të ishte miratuar më herët‘ – tha Rama, por sipas tij- ‘momenti i duhur ishte me ngritjen e institucioneve të reja të drejtësisë që kanë dhe besimin e partnerëve ndërkombëtarë.’
Për akuzat se po përpiqet të ketë kontrollin e pushtetit në duart e tij, Rama sqaroi se OFL-ja nuk merret me proceset gjyqësore, por me pasuritë e atyre që kanë pasur probleme me drejtësinë, të cilët duhet të provojnë nëse pasurinë e kanë vënë me burime të ligjshme apo nga para të botës së krimit.
“Kush nuk është i dënuar, nuk ka lidhje fare me OFL-në. Edhe kriminelë, të cilët janë aktivë, këtu apo jashtë dhe nuk kanë asnjë dënim fare, nuk janë objekt i këtij ligji. Ky ligj është shumë i thjeshtë. Unë di që ti je dënuar me dënim të formës së prerë dhe dënimin e ke për vete dhe nuk kam punë me gjyqin tënd, apo nuk kam ndërmend të bëj gjyqin tjetër. Shteti të thotë trego nga i ke këto pasuri”, tha Rama.
Për hetimin e politikanëve të korruptuar, Rama tha se ajo ditë është më e afërt nga sa mendohet, madje dhe vetë mezi pret që të vihet përballë OFL-së për të treguar se nuk vjen nga zullumi.
“Që do të vijë dita, do të vijë, është më afër sesa duket për të gjithë ne këtu. Unë i pari, pastaj për të gjithë të tjerët këtu, por edhe për ata që janë jashtë do të vijë dita që do të duhet të provojnë që nuk vijnë nga zullumi. Unë mezi e pres atë ditë, sepse më vjen keq kur politika në tërësi, duke thënë “ju kriminelët”, “ju bëni telefon me ata”, “ju… ju… ju…”. Nuk ka “ju… ju…” e keqja dhe balta i bie të gjithëve, ndërkohë që nuk jemi të gjithë njësoj. Ne dhe të gjithë ata që janë subjekt i deklarimit të pasurive kemi një institucion që na kontrollon çdo vit dhe çdo vit, ne bëjmë deklarimin e pasurisë sonë. Ama, nëse nesër vjen dita që dikush nga ne të shkojë përpara prokurorit apo gjykatësit, nuk diskutohet që ajo dosja e deklarimeve do merret dhe do fillojë avazi”, shtoi Rama.
Gjithashtu me 94 vota pro, 8 kundër dhe 4 abstenim u miratua Ligjin për Pronat, ku do të legalizohen të gjitha shtëpitë në fshat dhe tokat bujqësore.
