“Ka marrë përmasat e një krimi” Besa Shahini nga spitali i Fierit: Herën e parë thamë pakujdesi, tani do marrim masa

Ministrja e Arsimit Besa Shahini ka qenë sot e pranishme në spitalin e Fierit për të vizituar nxënësit që u helmuan sot në gjimnazin “Janaq Kilica”.

Ajo është shprehur se tashmë do të merren të gjitha masat e nevojshme ndaj personit që ka vendosur të hedhë sprajin e piperit ndaj nxënësve brenda shkollës.

Gjithashtu Shahini shtoi se herën e parë ngjarja u mor me seriozitet por menduan se mund të ishte pakujdesi kurse tani ajo theksoi se nuk mund të tolerohet më.

“Folëm me mjekë, duket që ka një irritim të organeve të frymëmarrjes, duket që ka qenë një pajisje e përdorur nga nxënësit edhe herën e parë edhe tani, herën e parë ne e morëm me shumë seriozitet por thamë se mund të jetë pakujdesi, apo se mund të ketë qenë se nxënësit kanë dashur të bëjnë sherr në shkollë, herën e dytë kjo është e patolerueshme, kjo po mbërrin në përmasat e një krimi, kështu që do marrim masat e nevojshme, policia dhe prokuroria kanë pa me shumë kujdes të gjithë rastin, i kanë marrë të gjitha masat e nevojshme, do gjejnë personat që kanë hedhur sprajin si herën e kaluar edhe kësaj radhe, kemi oficerin e sigurisë në shkollë por do shtojmë edhe dy të tjerë, do shtojmë kamera. është e papranueshme.

Shkolla merr masa ndaj nxënësve, ndërsa nëse ka qenë edhe dikush tjetër i përfshirë këtë e di më mirë drejtori i policisë. Do kemi më shumë policë në shkollë edhe më shumë kamera”, u shpreh ministrja Shahini.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern