Policia e Shtetit ka publikuar sot emrat dhe fotografitë e tre personave që konsiderohen të rrezikshëm dhe janë në kërkim për vrasje.
Në listë bie në sy edhe emri i Dritan Rexhepit, emri i të cilit u lakua për pengmarrjen dhe më pas ekzekutimin e Jan Prengës në muajin janar në zonën e Kamzës.
Dritan Rexhepi është objekt i punës nga Njësia e Kërkimit, por ai dihet se ku ndodhët, në një nga burgjet e Ekuadorit.
Rexhepi akuzohet për vrasjen e 2 personave në Fushë-Krujë dhe dyshohet si i përfshirë në rrëmbimin dhe vrasjen e Jan Prengës.
Dritan(Gramos) Rexhepi
Në datën 6 janar 1999, në Krujë, shtetasi Dritan Rexhepi ka vrarë me armë zjarri shtetasit D. K. dhe R. B. Dritan Rexhepi është dënuar me 25 vjet burg, nga Gjykata e Apelit për Krime të Rënda Tiranë, për veprat penale “Vrasja me dashje për shkak të cilësive të veçanta të viktimës”, “Plagosja e rëndë, me pasojë vdekjen” në bashkëpunim dhe “Armëmbajtja pa leje”.
Bledar Mneri
Në datën 30.11.2015, në Tiranë, shtetasi Bledar Mneri ka vrarë shtetasin V. B. Gjykata e Shkallës së Parë Tiranë i ka vendosur dënimin me 25 vjet burg, për veprat penale “Vrasja me paramendim” dhe “Armëmbajtja pa leje”.
Gazment Nebiu
Ky shtetas ka qenë pjesëtar i bandës së armatosur “Banda e Kakamit” dhe për këtë arsye Gjykata e Shkallës së Parë për Krime të Rënda e ka dënuar me 25 vjet burgim, për veprat penale “Vrasja me paramendim” e kryer në bashkëpunim, “Krijimi i bandës së armatosur”, “Vrasja me paramendim, e kryer në bashkëpunim, në kuadër të bandës së armatosur” (3 herë), “Vjedhja me dhunë, e kryer në bashkëpunim, në kuadër të bandës së armatosur” dhe “Armëmbajtja pa leje, në kuadrin e bandës së armatosur”.
