Agim Kajmaku është ish-kryebashkiaku i Vorës dalë nga rradhët e PS në zgjedhjet vendore të 30 qershorit.
Prej kohësh tashmë në arrati, mësohet se ai lëviz lirshëm nëpër Tiranë dhe Vorë.
Madje disa herë ai është parë duke pirë kafe në Hotel Autostation në Vorë.
Exit News, ka marrë sinjalizim nga dy persona, pa lidhje me njëri-tjetrin, për praninë e Agim-Kajmakut në barin e mësipërm.
Më pas vendndodhja e tij u verifikua në mënyrë të pavarur, ku u pa vërtetësia e këtyre sinjalizimeve.
Gjithashtu sipas informacioneve, Kajmaku është parë një nga fundjavat që sapo lamë pas duke ecur në një rrugë kryesore të Tiranës, vetëm 500 metra nga Drejtoria e Policisë Tiranë.
Ai ndodhej në shoqërinë e një personi tjetër.
Kajmaku mbante veshur një kapele bejsbolli blu të errët dhe një xhaketë blu, me jakën e ngritur lart. Shoqëruesi i tij kishte veshur një xhup të kuq, me një bluzë të bardhë dhe pantallona të zeza. Fotografitë e mëposhtme me rezolucion të dobët janë bërë në këtë rast.
Më pas ai u fut në një bar-kafe, ku identiteti i tij u verifikua sërish nga Exit News.
