Fakte dhe të dhëna janë publikuar nga historiani Kastriot Dervishi mbi të kaluarën e të moshuarit Ziqiri Mero, të cilin kryeministri Rama e puthi në ballë.
Ndërsa përmes një statusi në rrjetin social Facebook, Dervishi shkruan se Ziqir Mero ka qenë ish-ushtarak i regjimit komunist dhe agjitator i organizatës së “veteranëve” në mbrojtje të figurës së Enver Hoxhës.
Postimi i Kastriot Dervishit
Enveristi në kongres
Në tribunën e kongresit doli sot enveristi ziqiri mero, ish ushtarak i lartë i regjimit komunist, anëtari më i vjetër i partisë. Edhe udhëheqësi e puthi në ballë. Mero njihet si agjitator i organizatës së “veteranëve” në mbrojtje të figurës së terroristit Enver Hoxha. Për të mos u zgjatur shumë, kujtoj se dy vjet më parë mero u shpreh kundër dekorimit të nënave dhe fëmijëve që vuajtën në kampin e Tepelenës në vitet 1949-1953, sepse i quante “kolaboracionistë”. Kësisoj, në kongresin pa numër, një kampion enverizmi u evidentua në tribunë dhe kongresistët u çuan në këmbë me urdhër për të respektuar subjektin.
